ԵՄ-ն դադարեցրել է Սերբիային տրամադրվող ֆինանսավորումը

Եվրամիությունը ժամանակավորապես սառեցրել է Սերբիային Եվրոպական զարգացման հիմնադրամից վճարումները՝ դատական ​​համակարգում ստեղծված իրավիճակի պատճառով, Շվեյցարիայի Ֆրիբուրգ քաղաքում դասախոսության ժամանակ հայտարարել է ԵՄ ընդլայնման հարցերով հանձնակատար Մարթա Կոսը, գրում է DW-ի ռուսական ծառայությունը։

«Մենք ներկայում կասեցրել ենք Սերբիային զարգացման հիմնադրամից վճարումները, քանի որ երկիրը շեղվում է եվրոպական նորմերից իր դատական ​​համակարգում»,- բացատրել է Կոսը՝ հավելելով, որ Սերբիային ֆինանսավորումը չի վերսկսվի, մինչև Բելգրադը չշտկի այս իրավիճակը։

Politico-ն ապրիլի 10-ին հաղորդել էր, որ Եվրահանձնաժողովը քննարկում է Սերբիային մինչև 1,5 միլիարդ եվրոյի չափով ԵՄ միջոցներից զրկելու հարցը՝ երկրի ժողովրդավարական նահանջի և Ռուսաստանի հետ սերտ կապերի պատճառով։

2014 թվականին Սերբիան բանակցություններ էր սկսել Եվրամիությանը միանալու համար, ինչը նրան հնարավորություն տվեց ստանալ ֆինանսական օգնություն իրավական բարեփոխումներ իրականացնելու համար:

«[Սերբիային] այս վճարումներից զրկելու որոշումը կբարդացնի, այսպես կոչված, ԵՄ ընդլայնման գործընթացը, քանի որ այնպիսի երկրներ, ինչպիսիք են Ուկրաինան և Չեռնոգորիան, ցանկանում են հնարավորինս շուտ միանալ, իսկ ազդեցիկ տերությունները, ինչպիսին է Ֆրանսիան, կոչ են անում զգուշանալ»,- հաղորդել էր Politico-ն։

Ապրիլի 30-ին այն նշել էր, որ Ուկրաինայի արագացված անդամակցությունը ԵՄ-ին, նույնիսկ անհրաժեշտ բարեփոխումների իրականացումից առաջ, տեղի չի ունենա նման մտահոգությունների պատճառով: Այնուամենայնիվ, ԵՄ-ն քննարկում է Կիևին մի շարք տնտեսական և քաղաքական առավելություններ առաջարկելու հնարավորությունը նախաանդամակցության շրջանում, այդ թվում՝ միասնական եվրոպական շուկային ավելի մեծ մուտք և ԵՄ ծրագրերին ու հաստատություններին ավելի լայն մասնակցություն, լրատվամիջոցին հայտնել են դիվանագիտական ​​աղբյուրները:

Թարգմանությունը՝ Էմմա Չոբանյանի