11.06.2026 | 23:30
Սարգիս Սարգսյանը սահմանափակ կարողություններ ունեցող շախմատիստների ԱԱ-ի առաջատարների թվում է
ԵՄ-ին անդամակցությունն արագացնելու՝ Ուկրաինայի պահանջները լարվածություն են առաջացնում եվրոպացի գործընկերների հետ հարաբերություններում. FT
Քաղաքականություն
01.05.2026 | 15:56
Ուկրաինայի կառավարությունն ակտիվորեն պահանջում է արագացված անդամակցություն Եվրամիությանը, ինչը սրում է լարվածությունը եվրոպացի գործընկերների հետ հարաբերություններում։ Այս մասին գրում է Financial Times-ը՝ հղում անելով բանակցություններին ներգրավված յոթ աղբյուրների, գրում է Current time-ը։
Հրապարակման համաձայն՝ ԱՄՆ-ի ու ԵՄ-ի հետ բանակցություններում ուկրաինացի պաշտոնյաները պնդում են ինտեգրման արագ հաստատման հարցում և քննադատում Եվրահանձնաժողովին՝ Միության ընդլայնման նկատմամբ նրա մոտեցման համար։ Կիևը պնդում է, որ Եվրամիությունը ոչ պակաս հետաքրքրված է Ուկրաինայով, քան Ուկրաինան՝ անդամակցությամբ։
Եվրոպացի դիվանագետները, իրենց հերթին, նշում են, որ նման հռետորաբանությունը բարդացնում է բանակցությունները և անտեսում գործող ընթացակարգերը։
«Անդամակցությունը նվեր չէ։ Հնարավոր է՝ Կիևում որոշակի թյուրըմբռնում կա այս հարցում»,- ասել է աղբյուրներից մեկը։
Ըստ FT-ի՝ Ուկրաինայի նախագահ Վլադիմիր Զելենսկին դիվանագետներին հանձնարարել է չքննարկել ԵՄ-ի հետ մերձեցման այլընտրանքային ձևաչափերը և պնդել բացառապես լիիրավ անդամակցության հարցում։
Եվրոպացի դիվանագետները գնահատում են, որ նույնիսկ արագացված ընթացակարգերի դեպքում Ուկրաինայի անդամակցության գործընթացը կարող է տևել առնվազն տասը տարի։ Կիպրոսում կայացած ԵՄ գագաթնաժողովում, որին հրավիրված էր Ուկրաինայի նախագահ Վլադիմիր Զելենսկին, մի քանի առաջնորդներ փորձել են նվազեցնել Կիևի սպասումները։
«Դա այնքան էլ հեշտ չի լինի, որքան նա կարծում է»,- ասել է աղբյուրներից մեկը։
FT-ի աղբյուրները նաև նշել են Ուկրաինայում բարեփոխումների դանդաղումը, մասնավորապես, օրենքի գերակայության և կոռուպցիայի դեմ պայքարի ոլորտներում, ինչպես նաև եվրոպական շուկային ինտեգրվելու համար անհրաժեշտ օրենսդրության ընդունման ուշացումները։
Եվրամիությունն Ուկրաինային թեկնածուի կարգավիճակ շնորհել է 2022 թվականին՝ ռուսական հարձակումից հետո, իսկ անդամակցության բանակցությունները սկսել 2024 թվականին։ Եվրոպական հանձնաժողովի նախագահ Ուրսուլա ֆոն դեր Լեյենը շեշտել է ԵՄ-ին Կիևի անդամակցության կարևորությունը, սակայն նշել է, որ ընդլայնման գործընթացը հիմնված է մի շարք չափանիշների կատարման վրա և չի ենթադրում «կարճ ճանապարհներ»։
Թարգմանությունը՝ Էմմա Չոբանյանի
