Ստամբուլում ոստիկանությունն արցունքաբեր գազ է կիրառել և տասնյակ մարդկանց ձերբակալել մայիսմեկյան հավաքների ընթացքում. ՏԵՍԱՆՅՈՒԹ

Ստամբուլում ոստիկանությունն արցունքաբեր գազ է կիրառել և տասնյակ մարդկանց ձերբակալել, որոնք մայիսմեկյան ցույցերի են դուրս եկել, այն բանից հետո, երբ իշխանությունները փակել էին քաղաքի կենտրոնական Թաքսիմ հրապարակը, գրում է Turkish MInute։

Ոստիկանությունը թիրախավորել է քաղաքի եվրոպական կողմում գտնվող երկու խմբերի, երբ նրանք հայտարարել են երթով Թաքսիմ հասնելու մասին, որը նախկինում հակակառավարական բողոքի ցույցերի վայր էր և աշխատավորական խմբերի խորհրդանշական հավաքատեղի։ Թուրքական լրատվամիջոցները հաղորդել են առնվազն 57 ձերբակալվածի մասին։

Մայիսի 1-ին, որը նշվում է որպես Աշխատավորների միջազգային օր, ամեն տարի Թուրքիայում մեծ թվով ոստիկանական ուժեր են տեղակայվում, և իշխանությունները շրջափակում են Ստամբուլի կենտրոնի մեծ մասը Թաքսիմ հրապարակի շուրջը։

Անցյալ տարի ցույցերը տեղափոխվել էին  քաղաքի ասիական կողմ՝ Քադըքյոյ շրջան, ավելի քան 400 մարդ ձերբակալվել էր։

Ոստիկանները, որոնցից շատերը զինված են եղել հատուկ միջոցներով, մետաղական պատնեշները փակել են Ստամբուլի կենտրոնական թաղամասերի մուտքը։ Մեջիդիյեքյոյ շրջանում ոստիկանությունը նաև արցունքաբեր գազ է կիրառել ամբոխի դեմ։

Արհմիությունները և քաղաքացիական հասարակության խմբերը կոչ էին արել մայիսի 1-ին ցույցեր անցկացնել՝ «Հաց։ Խաղաղություն։ Ազատություն» կարգախոսով։

Այս շաբաթվա սկզբին թուրքական իշխանությունները 62 մարդու ձերբակալման և խուզարկության օրդերներ էին տվել՝ նշելով, որ նրանցից 46-ը, այդ թվում՝ լրագրողներ, արհմիությունների անդամներ և ընդդիմադիր գործիչներ, «հավանաբար կարող էին հարձակումներ իրականացնել»։

Թարգմանությունը՝ Էմմա Չոբանյանի