Թրամփի վարչակազմը հայտարարել է, որ Իրանի հետ հրադադարը նշանակում է՝ «պատերազմն ավարտել է»

ԱՄՆ նախագահ Դոնալդ Թրամփի վարչակազմը հայտարարել է, որ ապրիլի սկզբից գործող հրադադարը նշանակում է, որ Իրանի հետ պատերազմն արդեն ավարտվել է, և դա համապատասխանում է Կոնգրեսի կողմից հաստատման առաջիկա վերջնաժամկետին, գրում է DW-ն։

1973 թվականի Պատերազմական լիազորությունների բանաձևի համաձայն՝ նախագահը կարող է ռազմական գործողություններ սկսել 60 օր՝ նախքան ռազմական գործողությունների դադարեցումը կամ Կոնգրեսից թույլտվություն ստանալը։ Իրանի հետ պատերազմը սկսվել է ԱՄՆ-ի և Իսրայելի օդային հարվածներով փետրվարի 28-ին։ ԱՄՆ նախագահ Դոնալդ Թրամփը պաշտոնապես Կոնգրեսին տեղեկացրել է հակամարտության մասին 48 ժամ անց, ինչը նշանակում է, որ 60-օրյա ժամկետը լրանում է մայիսի 1-ին։ Բանաձևը նաև թույլ է տալիս 30-օրյա երկարաձգում։

Սպիտալ տան վարչակազմի բարձրաստիճան պաշտոնյան, որը խոսել է անանունության պայմանով, ասել է, որ ԱՄՆ-ի և Իրանի միջև կրակի փոխանակում չի եղել երեք շաբաթ առաջ սկսված հրադադարից ի վեր։

«Պատերազմական լիազորությունների բանաձևի նպատակների համար փետրվարի 28-ին՝ շաբաթ օրը սկսված ռազմական գործողությունները դադարեցվել են»,- հավելել է պաշտոնյան, ինչը նշանակում է, որ Թրամփը պարտավոր չի լինի Կոնգրեսի հաստատումը խնդրել։

Հայտարարությունը հնչում է այն բանից հետո, երբ ԱՄՆ պատերազմի նախարար Փիթ Հեգսեթը Սենատում լսումների ժամանակ հայտարարել էր, որ վարչակազմի «ըմբռնմամբ»՝ հրադադարը դադարեցրել է 60-օրյա հաշվարկը։ Դեմոկրատները վիճարկել են այդ մեկնաբանությունը՝ ասելով, որ նման դադարի համար իրավական հիմքեր չկան։

Ավելի վաղ վերլուծաբանները հայտարարել էին, թե ակնկալում են, որ Թրամփը կա՛մ կխախտի վերջնաժամկետը, կա՛մ կտեղեկացնի Կոնգրեսին, որ ցանկանում է 30-օրյա երկարաձգում։

Թեհրանի հետ հրադադարը մեծ մասամբ պահպանվում է, չնայած Իրանը շարունակում է արդյունավետորեն փակել Հորմուզի նեղուցը, իսկ ԱՄՆ ռազմածովային ուժերը շարունակում են շրջափակել իրանական նավահանգիստները։

Թարգմանությունը՝ Էմմա Չոբանյանի