Թրամփը դժգոհ է պատերազմը դադարեցնելու վերաբերյալ Իրանի վերջին առաջարկից

ԱՄՆ նախագահ Դոնալդ Թրամփը դժգոհ է երկամսյա պատերազմը լուծելու վերաբերյալ Իրանի վերջին առաջարկից, այս մասին Reuters-ին ասել է ամերիկացի պաշտոնյան։ Իրանի վերջին առաջարկի համաձայն՝ մի կողմ պետք է դրվի Թեհրանի միջուկային ծրագրի քննարկումը մինչև պատերազմի ավարտը և Պարսից ծոցից նավագնացության շուրջ վեճերի լուծումը, գրում է France 24-ը։

Նշվում է, թե քիչ հավանական է, որ դա կբավարարի ԱՄՆ-ին։ Նախագահ Դոնալդ Թրամփը պնդում է, որ միջուկային հարցերը պետք է լուծվեն սկզբից, այդ պատճառով նա դժգոհ է Իրանի առաջարկից։ Այս մասին ասել է ԱՄՆ պաշտոնյան, որը տեղեկացված է նախագահի և նրա խորհրդականների միջև երկուշաբթի օրը կայացած հանդիպման մասին և խոսել է  անանունության պայմանով։

2015 թվականին Իրանի և մի շարք այլ երկրների, այդ թվում՝ ԱՄՆ-ի միջև կնքված նախորդ համաձայնագիրը կտրուկ կրճատել էր Իրանի միջուկային ծրագիրը, որը, ինչպես նա վաղուց պնդում էր, ուղղված է խաղաղ, քաղաքացիական նպատակների։ Սակայն այդ համաձայնագիրը խզվեց, երբ Թրամփը միակողմանիորեն դուրս եկավ դրանից պաշտոնավարման առաջին ժամկետի ընթացքում։

Ապրիլի 27-ին Թրամփը քննարկել է Իրանի առաջարկն իր օգնականների հետ։ Ըստ WSJ-ի՝ ԱՄՆ նախագահն այն ուղղակիորեն չի մերժել, սակայն կասկածներ է հայտնել Իրանի բարի կամքի կամ պատրաստակամության վերաբերյալ՝ կատարելու հիմնական պահանջը՝ ուրանի հարստացումը դադարեցնելը։ WSJ-ի աղբյուրները հավելում են, որ ԱՄՆ-ն, այնուամենայնիվ, կշարունակի բանակցությունները Իրանի հետ։ Նրանք ասում են, որ Սպիտակ տունը, ինչպես սպասվում է, առաջիկա օրերին կներկայացնի իր պատասխանը և հակաառաջարկները։

Axios-ը հաղորդել էր, որ Թեհրանը Վաշինգտոնին է փոխանցել հրադադարի նոր առաջարկ։

Թարգմանությունը՝ Էմմա Չոբանյանի