26.10.2026 | 01:04
Մոտ 540 ձայնով պարտվել ենք Ստեփանավանում. ՔՊ-ական․ ՏԵՍԱՆՅՈւԹ
Իրանը Հորմուզի նեղուցի բացման առաջարկներ է ներկայացրել ԱՄՆ-ին. Axios
Քաղաքականություն
27.04.2026 | 11:37
Իրանը Միացյալ Նահանգներին առաջարկ է փոխանցել, որը նախատեսում է բացել Հորմուզի նեղուցը և դադարեցնել փետրվարի 28-ից սկսված պատերազմը։ Միաժամանակ, Թեհրանն առաջարկում է հետաձգել իր միջուկային ծրագրի շուրջ բանակցությունները։ Այս մասին հաղորդում է Axios-ը՝ հղում անելով աղբյուրներին, գրում է Meduza-ն։
Անցյալ շաբաթավերջին (ապրիլի 25-26) Իսլամաբադում կայացած բանակցությունների ժամանակ պակիստանցի միջնորդների միջոցով նոր առաջարկը ներկայացրել է Իրանի արտաքին գործերի նախարար Աբբաս Արաղչին։ Այն ենթադրում է հրադադարը երկարաձգել ավելի երկար ժամկետով կամ կողմերը համաձայնության գան պատերազմի վերջնական դադարեցման շուրջ։
Իրանի միջուկային ծրագրի շուրջ բանակցությունները, ըստ առաջարկի, պետք է սկսվեն Հորմուզի նեղուցի բացումից և իրանական նավահանգիստների շրջափակման վերացումից հետո։ Աբբաս Արաղչին, ըստ աղբյուրի, միջնորդներին հստակեցրել է, որ երկրի ղեկավարությունը բաժանված է ԱՄՆ պահանջներին արձագանքելու հարցում։ Վաշինգտոնը պնդում է, որ Իրանը պետք է դադարեցնի ուրանի հարստացումը առնվազն 10 տարով։
Սպիտակ տունը ստացել է Թեհրանի առաջարկը, սակայն առայժմ հայտնի չէ՝ արդյո՞ք Վաշինգտոնը պատրաստվում է քննարկել այն։
Ապրիլի 27-ին ԱՄՆ նախագահ Դոնալդ Թրամփն իր թիմի հետ քննարկելու է բանակցություններում առկա փակուղին, ինչպես նաև հնարավոր հաջորդ քայլերը։
Ապրիլի 24-ին Թրամփը իր դեսպաններ Սթիվ Ուիթկոֆին և Ջարեդ Քուշներին ուղարկել էր Իսլամաբադ՝ Իրանի արտգործնախարար Աբբաս Արաղչիի հետ բանակցելու։ Սակայն հաջորդ օրը նա հայտարարել էր, որ չեղարկել է նրանց ուղևորությունը։
«Ես որոշ ժամանակ առաջ, երբ նրանք պատրաստվում էին մեկնել, ասացի` «Ոչ, դուք 18 ժամ չեք թռչի այնտեղ։ Մենք բոլոր քարտերն ունենք ձեռքում։ Նրանք կարող են զանգահարել մեզ ցանկացած ժամանակ, բայց դուք 18-ժամյա թռիչքներ չեք կատարի նստելու և որևէ բան քննարկելու համար»»,- ասել էր Թրամփը, միաժամանակ, հերքելով, որ այս որոշումը պատերազմի վերսկսում է նշանակում։
Հորմուզի նեղուցն Իրանի կողմից փակված է Մերձավոր Արևելքի պատերազմի սկզբից ի վեր։ Հետագայում դրան ավելացավ ԱՄՆ-ի կողմից իրանական նավահանգիստների ռազմածովային շրջափակումը։
Թարգմանությունը՝ Էմմա Չոբանյանի
