Բրիտանիայի թագավորը ժամանել է ԱՄՆ. նա հանդիպել է Դոնալդ Թրամփին

Մեծ Բրիտանիայի թագավոր Չարլզ III-ը և նրա կինը՝ թագուհի Կամիլան, ապրիլի 27-ին պաշտոնական այցով ժամանել են  Միացյալ Նահանգներ: ԱՄՆ նախագահ Դոնալդ Թրամփն ու առաջին տիկին Մելանյա Թրամփը բրիտանական թագավորական զույգին հյուրընկալել են Վաշինգտոնում՝ Սպիտակ տանը, գրում է DW-ի ռուսական ծառայությունը։

Նախատեսված է, որ Չարլզ III-ը-ը ելույթ կունենա ԱՄՆ Կոնգրեսի երկու պալատների առջև։ Սա երկրորդ դեպքն է, որ բրիտանացի միապետը ելույթ է ունենում ԱՄՆ խորհրդարանում. նախորդ ելույթը եղել է Եղիսաբեթ II-ինը՝ 1991 թվականին։ Այնուհետև թագավորն ու թագուհին կմեկնեն Նյու Յորք՝ մասնակցելու 2001 թվականի սեպտեմբերի 11-ի ահաբեկչական հարձակումների զոհերի հիշատակին նվիրված միջոցառմանը։

Մեծ Բրիտանիայի միապետի ներկայիս այցը Միացյալ Նահանգներ առաջինն է 2007 թվականից ի վեր։ Այն տեղի է ունենում ուժեղացված անվտանգության պայմաններում՝ ապրիլի 25-ի երեկոյան Վաշինգտոն Հիլթոն հյուրանոցում տեղի ունեցած կրակոցների պատճառով, որտեղ Թրամփը հյուրընկալում էր Սպիտակ տան թղթակիցների ասոցիացիայի ամենամյա գալա ընթրիքը։

Associated Press-ը նշում է, որ Չարլզ III-ը Միացյալ Նահանգներ է ժամանել «զգայուն» առաքելությամբ՝ փորձելով վերականգնել ԱՄՆ-Մեծ Բրիտանիայի ավանդական սերտ հարաբերությունները, որոնք վերջերս խաթարվել են Իրանի հետ ԱՄՆ-Իսրայել պատերազմի պատճառով: Մարտին Մեծ Բրիտանիայի վարչապետ Քիր Սթարմերը մերժել էր ԱՄՆ-ին Իրանի դեմ հարվածների համար բրիտանական բազաներն օգտագործել և հրաժարվել բրիտանական ռազմանավեր ուղարկել Հորմուզի նեղուց:

Ապրիլի 1-ին բրիտանական The Telegraph-ին տված հարցազրույցում Թրամփը պնդել էր, որ Մեծ Բրիտանիայի ռազմածովային ուժերը չէին կարողանա բացել Հորմուզի նեղուցը, քանի որ նրանց նավերը «չափազանց հին» էին։ Թրամփը ՆԱՏՕ-ի երկրներին ընդհանուր առմամբ անվանել էր «վախկոտներ»՝ Իրանի դեմ պատերազմի հարցում իրենց դիրքորոշման համար։ Սպիտակ տան ղեկավարը դաշինքը համեմատել էր «թղթե վագրի» հետ և հայտարարել, որ «լրջորեն մտածում է» դրանից դուրս գալու մասին։

Իր հերթին, Սթարմերը ապրիլի սկզբին ITV News-ին տված հարցազրույցում նշել էր, որ «հոգնել է» բրիտանացիների էներգիայի հաշիվները «աճում և իջնում ​​են» «(Ռուսաստանի նախագահ Վլադիմիր Պուտինի) Պուտինի կամ Թրամփի գործողությունների պատճառով ամբողջ աշխարհում»։ The Guardian-ի համար գրված սյունակում բրիտանացի վարչապետը նշել է, որ իր կառավարությունը ներդրումներ է կատարում Մեծ Բրիտանիայի էներգետիկ ոլորտում՝ «ազատվելու գազի գները մանիպուլյացնող բռնակալներից»։

Միաժամանակ, Թրամփը մարտին հայտարարել էր, որ Վաշինգտոնի և Լոնդոնի միջև հարաբերությունների սառեցումը ոչ մի կերպ չի ազդի բրիտանական միապետի այցի վրա, քանի որ Չարլզ III-ը «ոչ մի կապ չունի» ՆԱՏՕ-ի հետ և, ԱՄՆ նախագահի խոսքերով, «հիանալի տղա» և «ընկեր» է։

Թարգմանությունը՝ Էմմա Չոբանյանի