27.07.2026 | 12:10
Այրված մեքենայում 3 դի է հայտնաբերվել // ԱՄՆ-ը դադարեցնում է Իրանին հարվածները․ ԼՈՒՐԵՐ
Դատավորների էթիկայի և կարգապահական հանձնաժողովի անդամի թափուր տեղում մեկ թեկնածու է առաջադրվել
27.04.2026 | 13:02
Դատավորների էթիկայի հանձնաժողովի ոչ դատավոր անդամ ընտրվելու համար առաջադրվել է մեկ թեկնածու՝ Մարգարիտա Ամյանը։ Նրան առաջադրել է «Իրավաբանների հայկական ասոցիացիա» հասարակական կազմակերպությունը։ Այս մասին տեղեկանում ենք Դատական իշխանության պաշտոնական կայքից։
Հիշեցնենք, որ մարտի 23-ին դատավորների էթիկայի և կարգապահական հանձնաժողովի ոչ դատավոր անդամ, փաստաբան Հարություն Հարությունանը, որն ամիսներ առաջ էր ընտրվել, հրաժարականի դիմում է ներկայացրել։ Որպես հրաժարականի պատճառ Հարությունյանը նշել է Դատական օրենսգրքում կատարված փոփոխությունները, համաձայն որոնց՝ փաստաբանները, որոնք կընտրվեն հանձնաժողովի անդամ, այլևս իրավունք չեն ունենա հանձնաժողովում պաշտոնավարման ընթացքում փաստաբանական գործունեությամբ զբաղվել։ Հարությունյանը հրաժարականից օրեր անց հայտարարել է նաև կուսակցություն ստեղծելու մասին և այժմ «Ուժեղ Հայաստան» կուսակցության հետ դաշինքով մասնակցում է ԱԺ ընտրություններին։
Նշենք, որ Դատական օրենսգրքում տեղի ունեցած փոփոխությունների համաձայն՝ էթիկայի հանձնաժողովի ոչ դատավոր անդամները նաև պետք է բարեվարքության ստուգում անցնեն, սակայն առաջադրված թեկնածուն՝ Մարգարիտա Ամյանը, ստուգում չի անցել․ այն ժամանակ, երբ մրցույթը հայտարարվել է, օրենքի փոփոխությունները դեռևս ուժի մեջ մտած չեն եղել, և նա առաջադրվել է՝ առանց բարեվարքության ստուգման։
Մարգարիտա Ամյանը Արդարադատության ակադեմիայի պրոռեկտորն է, նախկինում աշխատել է Դատական դեպարտամենտում, Վճռաբեկ դատարանում։
Արաքս Մամուլյան
