25.06.2026 | 23:51
Արմեն Մելիքբեկյանը մտադիր չէ առաջադրվել ՀՖՖ նախագահի ընտրություններում
Հրազդանի կիրճում կստեղծվի 5,5 կմ երկարությամբ բազմագործառութային հանգստի գոտի․ ավագանին հավանություն է տվել նախագծին
21.04.2026 | 18:05
Երևանի ավագանին հավանություն է տվել Հրազդանի կիրճում՝ 5,5 կիլոմետր տարածքում, բազմագործառութային հանգստի գոտի ստեղծելու ծրագրին, որի իրականացման համար պետական բյուջեից կհատկացվի 172,6 մլն դրամ։ Նախագծով նախատեսվում է կառուցել հանգստի և մարզական գոտիներ, բարեկարգել գետն ու ջրվեժները, ստեղծել նոր կանաչապատ և զբոսաշրջային ենթակառուցվածքներ, մինչդեռ Ամիրյան փողոցը Պապ թագավորի անունով վերանվանելու հարցը քվորումի բացակայության պատճառով չի ընդունվել։
«Հրազդանի կիրճում՝ 5,5 կիլոմետր տարածքում կստեղծվի հանգստի բազմագործառութային գոտի: Երևանի ավագանին հավանություն տվեց որոշման նախագծին. ծրագիրն իրագործելու համար պետական բյուջեից 172,608.2 հազ. դրամ կհատկացվի:
Այստեղ կկառուցվեն հանգստի գոտիներ, մարզական և այլ միջոցառումների հարթակներ, հարմարավետ զբոսայգի, բացօթյա կինոդիտման վայր, նաև՝ սրճարան, որը կդառնա սոցիալական շփումների կենտրոնը կիրճում, տարածքը կկանաչապատվի, կլինեն ճարտարապետական ու տեղանքի ինքնատիպ լուծումներ, կբարելավվեն տրանսպորտային և հետիոտնային ուղիները: Նախատեսվում է նաև մաքրել գետը, բարեկարգել դրա վրայի երկու ջրվեժներ և կառուցել դիմացի ափ տանող կամրջակ։
Վերակառուցվող ենթակառուցվածքները կնպաստեն տարածքի բնապահպանական վերականգնմանը։
Օրակարգի զեկուցվող հարցերում ընդգրկված՝ Ամիրյան փողոցը Պապ թագավորի անունով անվանափոխելու որոշման նախագիծը քվորում չլինելու պատճառով չընդունվեց:
Երևանի ավագանու հաջորդ հերթական նիստը կգումարվի մայիսի 7-ին»,- ասված է հաղորդագրությունում։
