14.09.2026 | 22:01
Հայաստանի մի շարք հասցեներում էլեկտրաէներգիայի անջատումներ կլինեն
946 ընտրող՝ առանց հստակ ընթացակարգի. ինչպե՞ս կքվեարկեն Սամվել Կարապետյանն ու տնային կալանքի տակ գտնվող մյուս անձինք
Քաղաքականություն
17.04.2026 | 19:43
Ընտրական օրենսգրքով կարգավորված չէ, թե ինչպես են տնային կալանքի տակ գտնվող անձինք, այդ թվում՝ 2026թ․ Ազգային Ժողովի ընտրություններում հայտ ներկայացրած «Ուժեղ Հայաստան» կուսակցության առաջնորդ Սամվել Կարապետյանը, մասնակցելու ընտրություններին։
Սամվել Կարապետյանը մեղադրվում է առանձնապես խոշոր չափերով փողերի լվացման և իշխանությունը զավթելու հրապարակային կոչի հոդվածներով։
Այսօր հայտնի դարձավ, որ Սամվել Կարապետյանը մինչև ընտրությունները կմնա տնային կալանքի տակ։ Factor TV-ի հետ զրույցում Կենտրոնական ընտրական հանձնաժողովի նախագահ Վահագն Հովակիմյանը նշեց, որ իրենց տիրույթում է ապահովել տնային կալանքում գտնվող անձանց ընտրական իրավունքի իրացումը, իսկ մեխանիզմի մշակման համար դիմել են Արդարադատության նախարարությանը։
Արդարադատության նախարարության մամուլի քարտուղար Մարիամ Մելքումյանը Factor TV-ին հայտնեց, որ առաջիկայում կստեղծվի աշխատանքային խումբ՝ տնային կալանքի տակ գտնվող անձանց ընտրական իրավունքն ապահովելու համար։ Նախարարությունից նաև հայտնեցին, որ այս պահի դրությամբ Հայաստանում կա տնային կալանքի տակ գտնվող 946 անձ։
Տնային կալանքը՝ որպես այլընտրանքային խափանման միջոց, սկսել է կիրառվել 2023 թ․ հունվարի 1-ից։ Դրան հաջորդած ընտրությունների ժամանակ ինչպես են տնային կալանքի տակ գտնվող անձինք մասնակցել քվեարկությանը, պարզ չէ։
«Իրազեկ քաղաքացիների միավորման» համակարգող Դանիել Իոաննիսյանը ենթադրում է, որ համայնքային ոստիկանի կամ պրոբացիայի ծառայողների ուղեկցությամբ են գնացել տեղամաս և քվեարկել։
«Դե, տնային կալանքները հիմա են հայտնվել ու շատացել։ Ճիշտն ասած՝ մենք դրա մասին չենք մտածել, բայց ես ենթադրում եմ, որ համայնքային ոստիկանի ուղեկցությամբ գալու են։ Համայնքային ոստիկանի կամ պրոբացիայի ծառայության ծառայողների ուղեկցությամբ գալու են, քվեարկեն, գնան էլի․ ես այդտեղ չեմ կարծում՝ շատ խնդիր կա»,- կարծիք հայտնեց Դանիել Իոաննիսյանը։
«Թրանսփարենսի Ինթերնեյշնլ հակակոռուպցիոն կենտրոնի» ծրագրի համակարգող Մերի Մինասյանը ևս տեղյակ չէ, թե ինչպես է իրականացվել տնային կալանքի տակ գտնվող անձանց իրավունքի իրացումը, ենթադրում է, որ չի կարգավորվել։
Տնային կալանքում գտնվող անձանց նկատմամբ հսկողությունն իրականացնում է Արդարադատության նախարարության Պրոբացիայի ծառայությունը, հետևաբար, մեխանիզմների մշակման կազմակերպումը նրանց տիրույթում է։
Ընտրական օրենսգրքում քրեակատարողական հիմնարկներում գտնվող անձանց և ձերբակալվածների դեպքում ներկայացվում է, թե ինչպես է կազմակերպվում նրանց՝ ընտրություններին մասնակցության գործընթացը։
ՀՀ ընտրություններին մասնակցելու իրավունք չունեն միայն այն քաղաքացիները, ովքեր դատարանի՝ օրինական ուժի մեջ մտած վճռով անգործունակ են ճանաչված, ինչպես նաև դիտավորությամբ կատարված ծանր և առանձնապես ծանր հանցանքների համար օրինական ուժի մեջ մտած դատավճռով դատապարտված և պատիժը կրող անձինք։
Factor TV-ն գրավոր հարցում է ուղարկել Արդարադատության նախարարություն՝ պարզելու, թե մինչ այս ինչպես են տնային կալանքում գտնվող անձինք իրացրել ընտրություններին մասնակցելու իրենց իրավունքը։ Պատասխանը ստանալուն պես՝ կհրապարակենք։
Հիշեցնենք, որ Արդարադատության փոխնախարար Գևորգ Քոչարյանը ապրիլի 7-ին ԱԺ արտահերթ նիստի ժամանակ հայտնել էր, որ տնային կալանքի տակ գտնվող անձինք քվեարկելու հնարավորություն կստանան, քանի որ դա սահմանադրությամբ սահմանափակված չէ։
Մարիա Խաչատրյան
