06.11.2026 | 01:59
Եվրոպա լիգա. «Արարատ-Արմենիան» ցավալի պարտություն կրեց Պորտուգալիայում. ՏԵՍԱՆՅՈՒԹ
Կրոնշտադտում հարված է հասցվել ռուսական ռազմանավին, որն ուղեկցում էր ռուսական «ստվերային նավատորմի» նավերը
Քաղաքականություն
03.06.2026 | 21:50
Ուկրաինական անօդաչու թռչող սարքերը Կրոնշտադտի նավահանգստում հարվածել են ռուսական «Բոյկի» ռազմանավին։ Այս մասին հայտնել է Ուկրաինայի զինված ուժերի անօդաչու համակարգերի ուժերի հրամանատար Ռոբերտ Բրովդին։ Նա ասել է, որ նավի վրա հրդեհ է բռնկվել, գրում է The Insider-ը։
Նշվում է, որ գրանցվել է առնվազն երկու հարված։ «Рыбарь»-ը հաղորդում է, որ «Բոյկի»-ն պլանային վերանորոգում էր անցնում Կրոնշտադտի գործարանի չոր նավամատույցում։
«Ինչո՞ւ էր ռազմանավն այդքան անպաշտպան դիրքում՝ հարցական է։ Նավատորմը չափազանց խոցելի է ուկրաինական ավիահարվածների նկատմամբ։ Ինչ վերաբերում է կապի միջոցներին, շատ հավանական է, որ օգտագործվել է Starlink արբանյակային տերմինալը։ Համակարգն արդեն իսկ լավ մշակված է. ԱԹՍ-ների փոխանցման կայաններից մեկը ձգվում է Բալթիկ ծովով դեպի Ֆինլանդական ծոցի միջազգային ջրեր և ազդանշան է հաղորդում հարձակման ԱԹՍ-ներին»,- նշում է տելեգրամ ալիքը։
The Insider-ի հաշվարկներով՝ սա Բալթյան նավատորմի երրորդ նավն է, որը վնասվել է լայնածավալ պատերազմի ընթացքում։ 2024 թվականի ապրիլին Կալինինգրադի մարզի Բալթիյսկում գտնվող բազայում դիվերսիոն հարձակման ժամանակ վնասվել է «Սերպուխով» հրթիռակիր նավը։ Այս տեսակի մեկ այլ նավ՝ «Գրադ»-ը, վնասվել էր 2025 թվականի հոկտեմբերին Կարելիայում։
2025 թվականի հունիսին հաղորդվել էր Ռուսաստանի ռազմածովային նավի կողմից Լա Մանշի միջով «ստվերային նավատորմի» լցանավի ուղեկցման առաջին դեպքի մասին: Գործողությանը մասնակցել է «Բոյկի» ռազմանավը: Հետագայում այն նաև ուղեկցել է «Գեներալ Սկոբելև» լցանավն ու «Սպարտա» բեռնատար նավը Բալթիկ ծովով դեպի Հյուսիսային ծով, ապա Լա Մանշի միջով դեպի Ատլանտյան օվկիանոս: Այս նավերը, ենթադրաբար, մասնակցել են Սիրիայի Տարտուսում գտնվող ռուսական բազայից ռազմական տեխնիկայի տարհանմանը: Ըստ The Insider-ի՝ «Բոյկի»-ն կեղծել է ազդանշանը՝ օգտագործելով ընդհանուր MMSI կոդը, որը հետևման համակարգերում ցուցադրվել է որպես տարբեր ծովային օբյեկտներ:
Միաժամանակ, այսօր՝ Սանկտ Պետերբուրգի միջազգային տնտեսական ֆորումի բացման օրը, քաղաքը ենթարկվել է ուկրաինական անօդաչու թռչող սարքերի զանգվածային հարձակման։ Մասնավորապես, հարվածներ են հասցվել Սանկտ Պետերբուրգի նավթային տերմինալին և Կրոնշտադտի, Կիրովսկիի և Կրասնոսելսկիի շրջանների ենթակառուցվածքային օբյեկտներին։
Թարգմանությունը՝ Էմմա Չոբանյանի
