02.06.2026 | 18:45
Սամվել Կարապետյանին վերադարձվեց ՀՀ անձնագիրը, որպեսզի կարողանա մասնակցել ընտրություններին
ՀԱՊԿ-ը դուրս է մնացել, IRI-ն և Եվրախորհրդարանը՝ ներգրավվել. ովքե՞ր են դիտորդելու հունիսի 7-ի ընտրությունները
02.06.2026 | 18:08
Հայաստանում հունիսի 7-ի խորհրդարանական ընտրություններին դիտորդական առաքելություն իրականացնելու նպատակով հավատարմագրվել են միջազգային և օտարերկրյա հասարակական 8 կազմակերպություններ։ Թե այդ կազմակերպություններից քանի՞ դիտորդներ են հետևելու ընտրական գործընթացներին, դեռ հայտնի չէ․ Արտաքին գործերի նախարարությունը դիտորդների տվյալներն ամփոփելու է մինչև հունիսի 4-ը։
2021-ի հունիսի 20-ի արտահերթ խորհրդարանական ընտրություններին հետևող միջազգային դիտորդական կազմակերպությունների թիվը նույնպես 8-ն էր, սակայն դերակատարների որոշ տարբերություն կա․ 2021-ին հավատարմագրված ՀԱՊԿ խորհրդարանական վեհաժողովը և ՌԴ հանրային պալատը ներկայում չեն հավատարմագրվել, փոխարենը դիտորդություն անելու համար գրանցվել են ամերիկյան Միջազգային հանրապետական ինստիտուտը (IRI) և Եվրոպական խորհրդարանը։
ՌԴ ԱԳՆ պաշտոնական ներկայացուցիչ Մարիա Զախարովան, հիշեցնենք, մայիսի 28-ին հայտարարել է, թե Հայաստանը ոչ պաշտոնապես տեղեկացրել է ընտրությունների դիտորդական առաքելության ցուցակներում Ռուսաստանի որոշ քաղաքացիների ընդգրկելու անցանկալիության մասին։
«Նրանց թվում են Պետդումայի երեք պատգամավորներ և Կարաչայ-Չերքեզիայի Հանրապետության ընտրական հանձնաժողովի ներկայացուցիչը։ Մենք խնդրել ենք պատճառներ և որոշակի արձագանք սրա վերաբերյալ։ Մենք պաշտոնական պատասխան չենք ստացել Երևանից, այդ թվում՝ այս որոշման դրդապատճառների վերաբերյալ»,- ասել է Զախարովան՝ միաժամանակ ենթադրություն հայտնելով, որ դա կարող է պայմանավորված լինել նրանով, որ այդ անձիք գտնվում են Եվրամիության պատժամիջոցների ցանկում։
Factor.am-ը ՀՀ ԱԳՆ-ից գրավոր հարցմամբ հետաքրքրվել է՝ ՌԴ դիտորդներից ո՞ւմ են մերժել հավատարմագրել և ի՞նչ պատճառով։ Պատասխանը ստանալուց հետո Factor.am-ը կհրապարակի այն։
Գայանե Խաչատրյան
