13.06.2026 | 00:58
ԱԱ-2026․ Կանադան խուսափեց պարտությունից Բոսնիա և Հերցեգովինայի դեմ խաղում․ ՏԵՍԱՆՅՈՒԹ
Կա՛մ Հայաստանը հաղթած դուրս կգա և կստիպի հաշվի նստել իր հետ, կա՛մ 20-30 տարով հետ կընկնի. Արման Նավասարդյանը՝ ՀԱՊԿ թնջուկի մասին․ ՏԵՍԱՆՅՈՒԹ
Քաղաքականություն
19.11.2018 | 20:08
Այն, ինչ կատարվում է ՀԱՊԿ-ի ներսում և դրա շուրջը, անպայմանորեն պետք է լիներ` հաշվի առնելով այդ կառույցի ներսում առկա խնդիրները, իսկ դա կլիներ ավելի վաղ, եթե ՀԱՊԿ անդամ պետություններից մեկը, օրինակ, ասեր այն, ինչ ասաց Հայաստանը։
Այս մասին Factor.am-ի հետ զրույցում ասաց Հայ-ռուսական համալսարանի համաշխարհային քաղաքականության և միջազգային հարաբերությունների ամբիոնի վարիչ, արտակարգ և լիազոր դեսպան Արման Նավասարդյանը։
«Այդ կազմակերպության երկու անդամները՝ Բելառուսը և Ղազախստանը, ամեն ինչ անում էին՝ ՀԱՊԿ-ն օգտագործելով ՀՀ-ի շահերի դեմ, որոնց հընթացս միացավ Ադրբեջանը, իսկ Խաչատուրովի դեպքն ընդամենը շարժառիթ էր՝ ի ցույց դնելու այն վրիպումներն ու բացերը, որոնք կան այդ կազմակերպության ներսում»,- նշեց նա։
Խոսելով այդ բացերի մասին՝ Արման Նավասարդյանը հիշեցրեց, որ հակահայկական քաղաքականություն ՀԱՊԿ անդամ պետություններից երկուսի կողմից ցուցաբերվել է նաև Խաչատուրովից առաջ։
«Պարզապես մեր ղեկավարությունը նախկինում համեստ կերպով լռում էր, ինչ ասում էին, գլուխը կախ լսում էր: Հիմա ավելացավ Ադրբեջանը, և ատելությանը տրվեց միջազգային տեսք, իսկ Փաշինյանը կտրեց այն, ինչ ուզում էին անել ՀԱՊԿ-ում, այն է՝ Ադրբեջանին տալ դիտորդի կարգավիճակ»,- ասաց դեսպանը՝ չբացառելով, որ հնարավոր է դեկտեմբերի 6-ին ևս որոշում չկայացվի, և Հայաստանի ներկայացուցիչը չստանձնի գլխավոր քարտուղարի պաշտոնավարումը։
«Չեմ կարծում, որ դա մեզ համար ահավոր հետևանք ունենա: Օրինակ՝ երբ ՀՀ-ի դեմ եղել են ռազմական ագրեսիվ գործողություններ, այդ պետությունները չեն կանգնել այն դաշնակցի կողքին, որի հետ պետք է աշխատեին»,- ասաց Արման Նավասարդյանը՝ ընդգծելով, որ միևնույն ժամանակ չի կիսում տեսակետը, թե Հայաստանն այս փուլում պետք է կանգնի ՀԱՊԿ-ից դուրս գալու խնդրի առաջ։
«Ռուսաստանն այս ֆորսմաժորային իրավիճակում չի գնա Հայաստանի դեմ: Ոչ թե մեր գեղեցիկ աչքերի համար, այլ այն պատճառով, որ Ադրբեջանի հետևից երևում են Թուրքիայի և Իսրայելի ականջները։ Կարող է ստեղծվել այնպիսի իրավիճակ, որ Ռուսաստանը դեմ գնա անգամ Բելառուսի և Ղազախստանի շահերին»,- ասաց Նավասարդյանը:
Նա բարձր գնահատեց ՀԱՊԿ-ում Հայաստանի վարած քաղաքականությունը՝ ընդունելով հանդերձ, որ կան լուրջ ռիսկեր. «Կա՛մ Հայաստանը հաղթած դուրս կգա և կստիպի հաշվի նստել իր հետ, կա՛մ 20-30 տարով հետ կընկնի միջազգային հարաբերություններից և աշխարհաքաղաքական զարգացումներից»:
Հարցազրույցն ամբողջությամբ՝ տեսանյութում:
Աղավնի Սուքիասյան
