27.10.2026 | 17:57
Դատավորին վիրավորելու համար մեղադրվող փաստաբանի նկատմամբ մեղադրական վերդիկտ է կայացվել
Թրամփը խնդրել է ռեկորդային 1.5 տրիլիոն դոլարի ռազմական բյուջե՝ սոցիալական ծրագրերի կրճատման հաշվին
Քաղաքականություն
03.04.2026 | 22:27
Սպիտակ տունը Կոնգրեսից 1.5 տրիլիոն դոլար է խնդրել 2027 թվականի ֆինանսական տարվա ռազմական ծախսերի համար, ինչը մոտավորապես 40%-ով ավելի է, քան ընթացիկ տարվա ռազմական բյուջեն: Եթե օրենսդիրները հաստատեն այս գումարը, ամերիկյան ռազմական ծախսերը կհասնեն նորագույն պատմության մեջ ռեկորդային մակարդակի, գրում է The Insider-ը ՝ հղում անելով The New York Times-ին։
Վարչակազմը ռազմական ծախսերի այդքան կտրուկ աճի պատճառ է նշում Իրանի հետ պատերազմը և զինամթերքի ու ռազմական տեխնիկայի պաշարները համալրելու անհրաժեշտությունը։ Թրամփը հրապարակավ հայտարարել է, որ ազգային անվտանգությունը պետք է լինի առաջնահերթություն, նույնիսկ սոցիալական ծրագրերի կրճատման գնով։ Նա պնդում է, որ նահանգները կարող են ինքնուրույն ֆինանսավորել առողջապահությունը և նախադպրոցական կրթությունը, մինչդեռ ամենակարևորը «ռազմական պաշտպանությունն» է։
Ռեկորդային պաշտպանության բյուջեի հետ մեկտեղ, Սպիտակ տունը առաջարկում է ներքին ծախսերը կրճատել 73 միլիարդ դոլարով կամ 10%-ով: Կլիմայի, բնակարանային և կրթական ծրագրերը հարվածի տակ կլինեն: Միևնույն ժամանակ, նախատեսվում է ավելացնել իրավապահ մարմինների ֆինանսավորումը: Օրինակ՝ Արդարադատության նախարարությունը կարող է ստանալ ավելի քան 40 միլիարդ դոլար՝ 13%-ով ավելի, քան ներկայիս մակարդակն է: Լրացուցիչ միջոցներ են պահանջվում սահմանային անվտանգության և զանգվածային արտաքսումների համար:
Թրամփը առաջարկում է միջոցների մեծ մասը (ավելի քան 1.1 տրիլիոն դոլար) անցկացնել ստանդարտ բյուջետային գործընթացով, իսկ մնացած 350 միլիարդ դոլարը՝ բյուջեի համաձայնեցման միջոցով, նույն մեխանիզմով, որը թույլ տվեց հանրապետականներին մեկ տարի առաջ իրականացնել հարկերի կրճատումները: Բյուջեի ամբողջական տարբերակը դեռևս չի հրապարակվել. վերլուծաբանները զգուշացնում են, որ ծրագրի իրականացումը կարող է տասնյակ տրիլիոն դոլարներով ավելացնել պետական պարտքը հաջորդ տասնամյակի ընթացքում։
Միևնույն ժամանակ, ինչպես հաղորդում է NYT-ը, առաջարկվող թվերը մտահոգություններ են առաջացրել երկու կուսակցությունների օրենսդիրների շրջանում: Դեմոկրատներն ու հանրապետականները բողոքում են, որ վարչակազմը չի տեղեկացնում Իրանի հետ պատերազմի ընթացքի մասին: Ավելին, օրենսդիրներն արդեն քվեարկել են 2026 թվականի բյուջեում նմանատիպ կրճատումների դեմ, ուստի ներկայիս առաջարկները ևս կարող են հանդիպել նմանատիպ դիմադրության։
Թարգմանությունը՝ Էմմա Չոբանյանի
