Կատարը պնդում է՝ իրանական հրթիռն իր տարածքում լցանավի է հարվածել․ Ծոցի երկրները շարունակում են հարձակումների ենթարկվել

Պարսից ծոցի երկրները շարունակում են իրանական հրթիռային հարձակումների ենթարկվել։ Կատարը հայտարարել է, որ իր պետական ​​էներգետիկ ընկերության վարձակալած լցանավը երկրի տարածքային ջրերում խոցվել է իրանական հրթիռով, գրում է France 24-ը։

«Կատարը թիրախավորվել է Իրանից արձակված երեք թևավոր հրթիռներով։ Զինվորականները որսացել են երկու թևավոր հրթիռ, մինչդեռ երրորդ հրթիռը հարվածել է QatarEnergy-ի վարձակալած նավթատար նավին՝ Կատարի տարածքային ջրերում։ Համապատասխան մարմինների հետ համակարգում է հաստատվել՝ 21 անձնակազմի անդամ ունեցող նավը առանց մարդկային զոհերի տարհանելու համար»,- ասվում է երկրի Պաշտպանության նախարարության հայտարարությունում։

Բացի այդ, հաղորդվում է, որ Քուվեյթի միջազգային օդանավակայանում իրանական անօդաչու թռչող սարքի հարձակումը վառելիքի բաքերի վրա խոշոր հրդեհ է առաջացրել։

«Քուվեյթի միջազգային օդանավակայանը ենթարկվել է Իրանի և նրա կողմից աջակցվող զինված խմբավորումների կողմից արձակված անօդաչու թռչող սարքերի բացահայտ հարձակումների։ Վառելիքի պահեստավորման բաքերը թիրախավորվել են, ինչի հետևանքով տարածքում խոշոր հրդեհ է բռնկվել»,- հայտնել է Քուվեյթի Քաղաքացիական ավիացիայի գլխավոր վարչության խոսնակ Աբդուլլահ Ալ Ռաջին։

Նա նշել է, որ զոհերի մասին տեղեկություններ չեն եղել, արտակարգ ծառայություններ են ուղարկվել։

ԱՄԷ-ում Բանգլադեշից մի տղամարդ է մահացել Ֆուջեյրա էմիրության ֆերմայում որսված անօդաչուի բեկորների անկման հետևանքով։

Բահրեյնի Ներքին գործերի նախարարության տվյալներով էլ՝ այսօր առավոտյան արտակարգ իրավիճակների ծառայության աշխատակիցներն արձագանքել են «իրանյան ագրեսիայի հետևանքով ընկերության օբյեկտում» բռնկված հրդեհին։

Սաուդյան Արաբիայի ՊՆ-ն հայտարարել է, որ առավոտյան որսացել և ոչնչացրել է երկու անօդաչու թռչող սարք, իսկ երեկ երեկոյան՝ ևս մի քանիսը։

Թարգմանությունը՝ Էմմա Չոբանյանի