26.10.2026 | 01:04
Մոտ 540 ձայնով պարտվել ենք Ստեփանավանում. ՔՊ-ական․ ՏԵՍԱՆՅՈւԹ
ԱՄԷ-ն պատրաստվում է օգնել ԱՄՆ-ին և մյուս դաշնակիցներին՝ ուժով բացել Հորմուզի նեղուցը. WSJ
Քաղաքականություն
01.04.2026 | 13:17
Արաբական Միացյալ Էմիրությունները պատրաստվում է օգնել ԱՄՆ-ին և մյուս դաշնակիցներին՝ ուժով բացել Հորմուզի նեղուցը։ Այս մասին գրում է The Wall Street Journal-ը՝ հղում անելով պաշտոնյաներին: Ըստ նրանց՝ ԱՄԷ-ն լոբբինգ է անում ՄԱԿ-ի Անվտանգության խորհրդի բանաձևի համար, որը կթույլատրի նման գործողությունները, գրում է Current time-ը։
Աղբյուրներից մեկը հայտնել է, որ ԱՄԷ իշխանությունները նաև վերանայել են նեղուցի անվտանգության ապահովմանը նպաստելու իրենց հնարավորությունները, ներառյալ՝ ականազերծման աշխատանքները: ԱՄԷ այլ պաշտոնյաներ հայտարարել են, որ ԱՄՆ-ը պետք է գրավի այս ջրային ուղու վրա գտնվող իրանական կղզիները, այդ թվում՝ Աբու Մուսա կղզին, որի նկատմամբ ԱՄԷ-ն հավակնություններ ունի։
ԱՄԷ արտաքին գործերի նախարարությունն ընդգծել է, որ «Հորմուզի նեղուցում նավարկության ազատությունը պահպանելու անհրաժեշտության վերաբերյալ լայն համաշխարհային կոնսենսուս կա»։
Ըստ որոշ տեղեկությունների՝ Իրանն արձագանքել է ԱՄԷ-ի դիրքորոշման փոփոխությանը՝ մի քանի շաբաթ տևած հանդարտությունից հետո սաստկացնելով հարձակումները։ Մարտի 31-ին ԱՄԷ-ի ուղղությամբ արձակվել է շուրջ 50 բալիստիկ, թևավոր հրթիռ և անօդաչու թռչող սարք։ Թեհրանը զգուշացրել է, որ կոչնչացնի Պարսից ծոցի ցանկացած պետության կենսականորեն կարևոր քաղաքացիական ենթակառուցվածքը, որը կաջակցի իր տարածքը գրավելու որևէ գործողության։
ԱՄՆ-ի մերձավոր դաշնակից Բահրեյնը ՄԱԿ-ում ներկայացրել է Հորմուզի նեղուցում նավագնացությունը պաշտպանելու վերաբերյալ բանաձևի նախագիծ: Reuters-ը հաղորդում է, որ Պարսից ծոցի երկրների և Միացյալ Նահանգների կողմից աջակցվող փաստաթղթում օգտագործվում է ուժի կիրառումը թույլատրող ձևակերպում, և Իրանի գործողությունները նկարագրվում են որպես միջազգային խաղաղության և անվտանգության սպառնալիք։
Բանաձևի նախագծի վերաբերյալ քվեարկությունը տեղի կունենա ապրիլի 2-ին: Այնուամենայնիվ, Ֆրանսիայի արտաքին գործերի նախարար Ժան-Նոել Բարրոն կարծում է, որ Բահրեյնի առաջարկը, հավանաբար, բավարար աջակցություն չի ստանա ՄԱԿ-ի անդամ պետությունների շրջանում: Փարիզը նույնպես ներկայացրել է նեղուցում նավագնացությունը պաշտպանելու վերաբերյալ բանաձևի նախագիծ, բայց այն ավելի շատ փոխզիջումային է և չի նախատեսում ռազմական ուժի կիրառում:
Փետրվարի 28-ին Միացյալ Նահանգներն Իսրայելի հետ համատեղ ռազմական գործողություն սկսեց Իրանի դեմ։ ԱՄՆ նախագահ Դոնալդ Թրամփը հայտարարել էր, որ կառավարությունը կարող է երկու-երեք շաբաթվա ընթացքում ավարտել Իրանի հետ պատերազմը:
Թարգմանությունը՝ Էմմա Չոբանյանի
