31.03.2026 | 18:10
Փաշինյանը Մոսկվա է մեկնում // Գրավից մինչև կալանքի միջնորդություն՝ եկեղեցու միջադեպի մասնակիցների համար. ԼՈՒՐԵՐ
Իրանը հայտնել է, որ հարվածների հետևանքով վնասվել են կրոնական վայր ու քաղցկեղի դեմ դեղամիջոցներ արտադրող ընկերության շենք
Քաղաքականություն
31.03.2026 | 16:27
ԱՄՆ-ի և Իսրայելի կողմից երեքշաբթի իրականացված հարվածների հետևանքով վնասվել է Իրանի հյուսիս-արևմուտքում գտնվող շիա մահմեդականների մզկիթը և կրոնական վայրը։ Հաղորդել են պետական լրատվամիջոցները՝ այսպիսով ավելացնելով պատերազմից տուժած մշակութային հաստատությունների և վայրերի ցանկը։
Պետական հեռուստատեսությունը հայտնել է, որ Զանջան քաղաքի Ֆիրդուսի փողոցում առավոտյան հարձակումից հետո վնասվել է Մեծ Հուսեյնիայի շենքը՝ շիաների հավաքույթների և սգո արարողությունների սրահը։ Վնասվել են «գմբեթի և մինարեթների որոշ հատվածներ»։
ՄԱԿ-ի տվյալներով՝ պատերազմի ընթացքում վնասվել են ՅՈՒՆԵՍԿՕ-ի ցանկում ընդգրկված Իրանի 29 վայրերից առնվազն 4-ը։ Դրանց թվում են Թեհրանի Գոլեսթան պալատը, Սպահանի Չեհել Սոտուն պալատը, նույն քաղաքում գտնվող Մասջեդ-ե Ջամե մզկիթը և Խորամաբադ հովտի նախապատմական վայրերը։
Բացի այդ, ԱՄՆ-ի և Իսրայելի կողմից հարվածներ են հասցվել Իրանի խոշորագույն դեղագործական ընկերություններից մեկի շենքին, որն արտադրում է անզգայացնող և քաղցկեղի դեմ դեղամիջոցներ, հայտարարել է Իրանի կառավարությունը։
«Երեքշաբթի առավոտյան քաղաքացիական կենտրոնների վրա ԱՄՆ-ի և սիոնիստական ռեժիմի հարձակումների ժամանակ վնասվել է քաղցկեղի դեմ, ինչպես նաև անզգայացնող և մասնագիտացված դեղամիջոցներ արտադրող խոշորագույն ընկերություններից մեկը, վնասվել է դեղերի արտադրության հոսքագիծը»,- ասվում է կառավարության կողմից X-ում հրապարակված հաղորդագրությունում։
Թարգմանությունը՝ Էմմա Չոբանյանի
