ԱՄՆ-ը վերանայելու է ՆԱՏՕ-ի հետ հարաբերությունները Իրանի հետ պատերազմից հետո. Ռուբիո

ԱՄՆ-ի համար ՆԱՏՕ-ի դաշնակիցների վարքագիծը Իրանի դեմ պատերազմին չաջակցելու հարցում «շատ հիասթափեցնող» էր, և Վաշինգտոնը կվերանայի դաշինքի հետ հարաբերությունները ռազմական գործողության ավարտից հետո։ Այս մասին հայտարարել է ԱՄՆ պետքարտուղար Մարկո Ռուբիոն Al Jazeera հեռուստաալիքին տված հարցազրույցում, գրում է Meduza-ն։

Հարցին՝ արդյո՞ք կարծում է, որ ԵՄ-ն և ՆԱՏՕ-ի երկրները դավաճանել են Միացյալ Նահանգներին «այս վճռորոշ պահին», Ռուբիոն պատասխանել է․ «Կարծում եմ՝ սա շատ հիասթափեցնող էր։ Եվ կրկին, նախագահը և մեր երկիրը ստիպված կլինեն վերանայել այս ամենը գործողության ավարտից հետո։ ՆԱՏՕ-ի կողմից Միացյալ Նահանգներին օգուտ բերող պատճառներից մեկը տարբեր սցենարների համար բազաներին հասանելիությունն է»։

Նա հիշեցրել է, որ «անհրաժեշտության պահին», երբ Միացյալ Նահանգները որոշեց, որ ազգային անվտանգությանը և իր շահերին լուրջ սպառնալիք կա, Վաշինգտոնը բախվեց ՆԱՏՕ-ի անդամների, մասնավորապես, Իսպանիայի կողմից բազաների օգտագործման արգելքին։

«Եվ կան այլ երկրներ, որոնք նույնն են արել։ Այդ ժամանակ հարց է առաջանում՝ ո՞րն է Միացյալ Նահանգների շահը։ Ես միշտ աջակցել եմ ՆԱՏՕ-ին, և այդ աջակցության պատճառներից մեկն այն է, որ բազաներին հասանելիությունը մեզ լծակներ և ճկունություն է տալիս ամբողջ աշխարհում ռազմական գործողություններում: Բայց եթե ՆԱՏՕ-ն միայն նրա համար է, որ  մենք պաշտպանում ենք Եվրոպան հարձակման դեպքում, մինչդեռ մեզ մերժում են բազաներին հասանելիություն ունենալ, երբ դրանք մեզ անհրաժեշտ են, դա այնքան էլ լավ համաձայնագիր չէ: Այս ձևաչափում դժվար է մնալ ներգրավված և ասել, որ դա օգուտ է բերում Միացյալ Նահանգներին: Այսպիսով, այս ամենը պետք է վերանայվի: Այս ամենը պետք է վերանայվի»,- ասել է  նա:

Մարտի սկզբին Իսպանիան հրաժարվեց թույլ տալ ԱՄՆ-ին օգտագործել իր բազաները Իրանի դեմ հարվածների համար։ Թրամփը պատասխանեց՝ սպառնալով խզել առևտրային հարաբերությունները Մադրիդի հետ։ Դրանից հետո Իսպանիայի վարչապետ Պեդրո Սանչեսը հայտարարություն էր տարածել՝ կոչ անելով դիվանագիտական ​​կարգավորման հակամարտությունների և դեմ արտահայտվելով ԱՄՆ-ի և Իսրայելի կողմից սկսված պատերազմին։

Թարգմանությունը՝ Էմմա Չոբանյանի