Իսպանիան փակել է իր օդային տարածքը Իրանի պատերազմին մասնակցող ամերիկյան ինքնաթիռների համար

Իսպանիան փակել է իր օդային տարածքը Իրանի դեմ ԱՄՆ-ի և Իսրայելի ռազմական գործողությանը մասնակցող ինքնաթիռների համար։ Այս մասին հաղորդում է El Pais-ը՝ հղում անելով աղբյուրներին, գրում է The Insider-ը։

Հրապարակման համաձայն՝ Մադրիդն արգելել է հարձակումներին մասնակցող ինքնաթիռների, այդ թվում՝ կործանիչների և օդային լցանավերի կողմից Ռոտա և Մորոն դե լա Ֆրոնտերա ավիաբազաների օգտագործումը։ Բացի այդ, Իսպանիան թույլ չի տալիս երրորդ երկրներում, ինչպիսիք են Մեծ Բրիտանիան և Ֆրանսիան, տեղակայված ամերիկյան ինքնաթիռներին թռչել իր օդային տարածքով։ Բացառություններ հնարավոր են միայն արտակարգ իրավիճակներում։

Պաշտպանության նախարար Մարգարիտա Ռոբլեսը հաստատել է այս տեղեկությունը։

«Մենք չենք թույլատրում ո՛չ ռազմական բազաների, ո՛չ էլ օդային տարածքի օգտագործումը Իրանի պատերազմի հետ կապված գործողությունների համար։ Կարծում եմ՝ բոլորը գիտեն Իսպանիայի դիրքորոշումը. այն շատ հստակ է»,- Մադրիդում լրագրողներին ասել է Ռոբլեսը՝ Իրանում պատերազմն անվանելով «խորապես անօրինական և խորապես անարդար»։

Միևնույն ժամանակ, Իսպանիան շարունակում է կատարել իր մյուս պարտավորությունները Միացյալ Նահանգների նկատմամբ։ Մասնավորապես, երկիրն աջակցություն է ցուցաբերում Եվրոպայում տեղակայված շուրջ 80,000 ամերիկյան զորքերին։ Իսպանիայի օդային նավիգացիոն ծառայությունները նաև աջակցում են ԱՄՆ-ից Իրանին հարվածելու համար ամերիկյան ռմբակոծիչների թռիչքներին, չնայած ինքնաթիռները չեն մտնում Իսպանիայի օդային տարածք։

Իսպանիայի վարչապետ Պեդրո Սանչեսը նախկինում հայտարարել էր, որ երկիրը չի աջակցի ռազմական գործողությանը, որը, նրա կարծիքով, խախտում է միջազգային իրավունքը։ Նա նաև ընդգծել է, որ Մադրիդը դեմ է իրանական ռեժիմին։

Սանչեսի խոսքով՝ Մերձավոր Արևելքում հակամարտությունն Իսպանիային արժենում է ամսական շուրջ 100 միլիարդ եվրո։ ԱՄՆ նախագահ Դոնալդ Թրամփը, իր հերթին, սպառնացել էր խզել առևտրային կապերն Իսպանիայի հետ։

Թարգմանությունը՝ Էմմա Չոբանյանի