Թրամփը շնորհակալություն է հայտնել Լուկաշենկոյին քաղբանտարկյալների ազատելու համար

ԱՄՆ նախագահ Դոնալդ Թրամփը «ամենաջերմ շնորհակալությունն է» հայտնել Բելառուսի նախագահ Ալեքսանդր Լուկաշենկոյին՝ մարտի 19-ին Մինսկում Լուկաշենկոյի և ԱՄՆ նախագահի հատուկ դեսպան Ջոն Քոուլի միջև կայացած բանակցություններից հետո 250 քաղբանտարկյալների ազատ արձակման համար: TruthSocial-ում նա գրել է, որ 2025 թվականի մայիսից ի վեր Բելառուսում ազատ արձակված քաղբանտարկյալների ընդհանուր թիվը հասնում է ավելի քան 500-ի, գրում է DW-ի ռուսական ծառայությունը։

Բելառուսում քաղբանտարկյալների ևս մեկ խմբի ազատ արձակումը բանակցային գործընթացի արդյունք է, որի շրջանակներում Ալեքսանդր Լուկաշենկոն ձգտում է կարգավորել հարաբերությունները Վաշինգտոնի հետ և վերացնել պատժամիջոցները՝ բռնաճնշումների մեղմացման դիմաց։

Մարտի 19-ի համաձայնագրի արդյունքում Վաշինգտոնը համաձայնվել է մեղմացնել Բելառուսի ֆինանսական հատվածի նկատմամբ սահմանափակող միջոցառումները՝ «Բելինվեստբանկ»-ը, «Զարգացման բանկ»-ը և Ֆինանսների նախարարությունն ազատելով պատժամիջոցներից, միաժամանակ, ամբողջությամբ վերացրել է մնացած պատժամիջոցները «Բելառուսկալի», «Բելառուսական կալիումի», «Ագրորոզկվիտ» կալիումի ընկերությունների և Ֆինանսների նախարարության նկատմամբ։

Բելառուսական «Գարուն» իրավապաշտպան կազմակերպության տվյալներով՝ մինչև մարտի 19-ին ազատ արձակումների մասին հայտարարելը երկրում կար ավելի քան 1100 քաղբանտարկյալ։

Ի թիվս այլ բաների՝ գրառման մեջ Դոնալդ Թրամփը նշել է, որ անհամբեր սպասում է Ալեքսանդր Լուկաշենկոյի հետ հանդիպմանը «Խաղաղության խորհրդի» առաջիկա նիստում, որը ստեղծվել է ԱՄՆ նախագահի նախաձեռնությամբ: Այս մարմինը, որը զբաղվում է գլոբալ հակամարտությունների կարգավորմամբ, կենտրոնացած է ԱՄՆ նախագահ Դոնալդ Թրամփի վրա և դիտորդների կողմից քննադատության է ենթարկվել՝ որպես ՄԱԿ-ի հետ մրցակցող։

Իր գրառման մեջ Թրամփը Լուկաշենկոյին անվանել է «բարձր հարգանքի արժանի նախագահ»: Բելառուսից բացի՝ «Խաղաղության խորհրդի» կազմում ներկայում ընդգրկված է ևս 27 երկիր, այդ թվում՝ Հայաստանը: Գերմանիան մերժել է հրավերը:

Թարգմանությունը՝ Էմմա Չոբանյանի