Լուկաշենկոն հայտարարել է, որ ԱՄՆ-ը Բելառուսին «մեծ գործարք» է առաջարկել

Բելառուսի ղեկավար Ալեքսանդր Լուկաշենկոն Մինսկում ԱՄՆ նախագահի հատուկ դեսպան Ջոն Քոուլի հետ հանդիպումից և 250 քաղբանտարկյալների ազատ արձակումից հետո հայտարարել է, որ Միացյալ Նահանգները Բելառուսին «մեծ գործարք» է առաջարկել, գրում է Current time-ը։

Լրագրողների հետ զրույցում Լուկաշենկոն նշել է, որ «գործարքն» առաջարկվել է ԱՄՆ նախագահ Դոնալդ Թրամփի անունից։

«Սա կարևոր է Բելառուսի, այդ թվում՝ ինձ համար։ Ահա թե ինչու ես ասացի. «Ես դա նորմալ եմ ընկալում, փոխանցեք  Դոնալդին, որ ես համաձայն եմ մշակել այս մեծ գործարքը, պատրաստել այն»»,- ասել է նա՝ հավելելով, որ համաձայնագրի վրա աշխատանքներն արդեն ընթացքի մեջ են։

Լուկաշենկոն նշել է, որ քաղբանտարկյալների հետագա ազատ արձակումից (նա հերքում է, որ նրանք դատապարտվել են քաղաքական պատճառներով) և պատժամիջոցների վերացումից բացի՝ «մեծ գործարքը» կարող է վերաբերել նաև դեսպանատների վերաբացմանն ու միջուկային նյութերի վերահսկողությանը: Նա նաև նշել է իր մտադրությունը՝ այցելել Միացյալ Նահանգներ և մասնակցել Խաղաղության խորհրդի հաջորդ նիստին, որին նրան հրավիրել է Դոնալդ Թրամփը։

Լուկաշենկոյի հետ հանդիպումից հետո Թրամփի հատուկ ներկայացուցիչ Ջոն Քոուլը նշել էր, որ Մինսկի և Վաշինգտոնի միջև հարաբերությունները բարելավվել են, միաժամանակ, հայտարարել, որ մի քանի բելառուսական բանկերի և Ֆինանսների նախարարության դեմ նախկինում սահմանված պատժամիջոցները կվերացվեն։ ԱՄՆ-ը նախկինում վերացրել էր «Բելավիա»-ի և «Բելառուսկալի»-ի դեմ պատժամիջոցները։

Վաշինգտոնը դեռևս չի մեկնաբանել Լուկաշենկոյի կողմից «մեծ գործարքի» մասին հայտարարությունները։

Քոուլը նաև հույս է հայտնել, որ բոլոր քաղբանտարկյալներն ազատ կարձակվեն մինչև տարեվերջ: Մարտի 19-ին հաղորդվել էր, որ Բելառուսի իշխանությունները ազատ են արձակել 250 մարդու, որոնցից 15-ը  մեկնել են Լիտվայի տարածք: DissidentBY-ի փոխանցմամբ՝ Բելառուսում մնացած քաղբանտարկյալները սկսել են դուրս են գալ ազատազրկման վայրերից մարտի 20-ին:

Թարգմանությունը՝ Էմմա Չոբանյանի