24.04.2026 | 00:23
Սպերցյանի գոլն օգնել է «Կրասնոդարին» հաղթել «Սպարտակին»․ ՏԵՍԱՆՅՈՒԹ
Թուրքիայում ավարտվել է սպանված ռուս դեսպանի գործով հետաքննությունը
Քաղաքականություն
16.11.2018 | 18:11
Թուրքիայում ավարտվել է Ռուսաստանի արտակարգ և լիազոր դեսպան Անդրեյ Կառլովի սպանության գործով ընթացող հետաքննությունը. փոխանցում է ermenihabe-ը:
Հետաքննության շրջանակներում Անկարայի Հանրապետական դատախազության ահաբեկչության դեմ պայքարի բյուրոն եկել է այն եզրակացության, որ ռուս դեսպանի սպանության կազմակերպման գործում թիվ մեկ մեղադրյալը իսլամի քարոզիչ, ամերիկաբնակ միլիարդատեր Ֆեթուլլահ Գյուլենն է։ Նրա հետ միասին պատվիրատուների թվում են ընդգրկվել նաև Շերիֆ Թեքալան և Էմրե Ուսլուն։
Գյուլենը համարվում է Թուրքիայում ահաբեկչական համարվող գյուլենական համայնքի առաջնորդը։ Թուրքական իշխանությունները նրան մեղադրում են 2016թ. հուլիսի 15-ի ռազմական հեղաշրջման փորձը նախաձեռնելու մեջ։
Այժմ մեղադրական եզրակացությունը կներկայացվի Անկարայի հանրապետական գլխավոր դատախազի վավերացմանը: Եթե դատախազը մեղադրականը հաստատի, ապա այն կուղարկվի դատարան։
Հիշեցնենք, որ Կառլովը սպանվել էր 2016-ի դեկտեմբերի 19-ին Անկարայում։Հարձակումն իրականացրել է Մևլութ Մերթ Ալթընթաշը։ Նա եղել է ոստիկանության աշխատակից, ով մտել է թանգարան, Կառլովի ելույթի ժամանակ նախ օդ է կրակել, ապա կրակել է դեսպանի վրա թիկունքից։ Թուրքական ոստիկանությունն Ալթընթաշին հենց սպանության վայրում վնասազերծել է։
