Քաղաքականություն
25.03.2026 | 19:33
Իրանը մերժել է պատերազմը դադարեցնելու՝ ԱՄՆ առաջարկը և ներկայացրել հրադադարի պայմաններ, հաղորդել է Press TV-ն՝ հղում անելով բարձրաստիճան պաշտոնյայի։
«Իրանը կավարտի պատերազմը, երբ որոշի դա անել, և երբ իր սեփական պայմանները կատարվեն։ Մինչ այդ, բանակցություններ չեն վարվի։ Իրանի պաշտպանական գործողությունները կշարունակվեն՝ մինչև մեր պայմանները կատարվեն»,- ասել է պաշտոնյան՝ ԱՄՆ-ի առաջարկը որակելով «չափազանց»։
Ըստ Press TV-ի՝ պաշտոնյան ներկայացրել է հինգ պայման, այդ թվում՝ թշնամու կողմից «ագրեսիայի և սպանությունների» լիակատար դադարեցում, Իսլամական Հանրապետությունում պատերազմի վերսկսումը կանխելու համար հատուկ մեխանիզմների ստեղծում, պատերազմական վնասների և փոխհատուցումների երաշխավորված և հստակ սահմանված վճարում, պատերազմի ավարտ բոլոր ճակատներում և տարածաշրջանում ներգրավված բոլոր դիմադրության խմբերի համար, միջազգային ճանաչում և երաշխիքներ Հորմուզի նեղուցի նկատմամբ Իրանի ինքնիշխան իրավունքի վերաբերյալ։
Press TV-ն հայտնում է, որ Վաշինգտոնը բանակցություններ է վարում տարբեր դիվանագիտական ուղիներով, սակայն Թեհրանը առաջարկները համարում է «չափազանց»։
Այս մեկնաբանությունները հնչում են այն բանից հետո, երբ իրանցի բարձրաստիճան պաշտոնյան Reuters-ին հայտնել էր, որ Պակիստանը Թեհրանին է ներկայացրել ԱՄՆ առաջարկը, և որ Թուրքիան կամ Պակիստանը կարող են դիտարկվել որպես հնարավոր բանակցությունների վայր։
Ավելի վաղ ԱՄՆ-ն Իրանին էր փոխանցել պատերազմը դադարեցնելու 15 կետանոց ծրագիրը։
Թարգմանությունը՝ Էմմա Չոբանյանի
