25.03.2026 | 19:20
Goal․com․ Անգլիայի Պրեմիեր լիգայի լավագույն ֆուտբոլիստները 21-րդ դարում
Իրանը Թրամփի վարչակազմին հայտնել է, որ նախընտրում են բանակցել Վենսի, ոչ թե Ուիթկոֆի հետ. CNN
Քաղաքականություն
25.03.2026 | 16:13
Իրանի ներկայացուցիչները ԱՄՆ նախագահի վարչակազմին հասկացրել են, որ չեն ցանկանում վերսկսել բանակցությունները Դոնալդ Թրամփի հատուկ դեսպան Սթիվ Ուիթկոֆի և փեսայի՝ Ջարեդ Քուշների հետ, այլ կնախընտրեին շփվել փոխնախագահ Ջեյ Դի Վենսի հետ, СNN-ին հայտնել են երկու տարածաշրջանային աղբյուրներ։
Հաղորդագրությունը, որը անուղղակի խողովակներով փոխանցվել է ԱՄՆ-ին, ազդանշան է տալիս, որ Իրանը կարծում է, որ Ուիթկոֆի և Քուշների մասնակցությամբ քննարկումներն արդյունավետ չեն լինի՝ հաշվի առնելով վստահության դեֆիցիտը, որն առաջացել է Իսրայելի և ԱՄՆ-ի կողմից ռազմական գործողություններ սկսելուց առաջ բանակցությունների խափանումից հետո։ Ի տարբերություն Ուիթկոֆի, Քուշների և նույնիսկ պետքարտուղար Մարկո Ռուբիոյի, աղբյուրների համաձայն, Վենսն ավելի հակված է պատերազմը դադարեցնելուն։
«Տպավորությունն այն է, որ Վենսը մտադիր կլինի ավարտին հասցնել հակամարտությունը»,- ընդգծել են աղբյուրները։
Այնուամենայնիվ, տարածաշրջանային խաղացողները նաև հասկանում են, որ բանակցությունների մեջ մտնելը կարող է ռիսկային լինել Վենսի համար, քանի որ հակամարտությանը վերջ դնելու համար համաձայնության հասնելը դժվար կլինի։
Ուիթկոֆը, մասնավորապես, շարունակում է ակտիվորեն ներգրավված լինել ԱՄՆ-ի կողմից պորտֆելի ստեղծման գործում, և աղբյուրները նշել են, որ իրանցիները, հավանաբար, այլընտրանք չեն ունենա, քան Թրամփի վարչակազմի կողմից բանակցությունների ուղարկվող անձի հետ համագործակցելը։
«Ում վարչակազմը որոշի ուղարկել, իրանցիները ստիպված կլինեն գործ ունենալ նրա հետ, բայց դա չի նշանակում, որ նրանք նախապատվություն չունեն»,- ասել է երկրորդ աղբյուրը։
Սպիտակ տան մամուլի քարտուղար Քարոլայն Լիվիթը CNN-ին ասել է, որ ԱՄՆ-ի անունից բանակցություններ վարողը հենց Թրամփն է:
«Ինչպես այսօր հայտարարեց նախագահը՝ փոխնախագահ Վենսը, պետքարտուղար Ռուբիոն, հատուկ դեսպան Ուիթքոֆը և պարոն Քուշները բոլորը կմասնակցեն»,- ասել է Լիվիթը։
Առայժմ ԱՄՆ-ի և Իրանի միջև այս շաբաթվա վերջին Իսլամաբադում հանդիպման հավանականությունը մնում է հնարավոր, սակայն նույնիսկ նրանք, ովքեր կողմ են դրա անցկացմանը, կասկածում են, որ այն իրականում տեղի կունենա, հայտնել են աղբյուրները։
Թարգմանությունը՝ Էմմա Չոբանյանի
