Հայաստանի ֆուտբոլի ֆեդերացիան ակումբների հետ քննարկում է ունեցել լեգեոնականների սահմանափակման վերաբերյալ, հաղորդում է ՀՖՖ մամուլի ծառայությունը։
«Մարտի 16-ին ՀՖՖ գլխավոր քարտուղար Էդգար Պետրոսյանն ու ՀՖՖ մրցումների բաժնի պետ Դավիթ Հարությունյանը հանդիպել էին Fastex Հայաստանի Պրեմիեր լիգայի բոլոր և Առաջին խմբի 4 ակումբի ներկայացուցիչներին։
Քննարկվել էր Fastex Հայաստանի Պրեմիեր լիգայի հանդիպումներին միաժամանակ խաղադաշտում գտնվող և հայտացուցակի՝ Հայաստանում մարզված ֆուտբոլիստների քանակի հնարավոր փոփոխությունն առաջիկա 2 մրցաշրջանում։
Համաձայն ՀՖՖ պրոֆեսիոնալ ֆուտբոլի մրցումների անցկացման կանոնակարգի՝ Հայաստանի Պրեմիեր լիգայի հանդիպումներում ներկայումս պարտադիր է հետևյալ դրույթը. «Խաղերին արձանագրությունում ընգրկված 23 ֆուտբոլիստներից 9-ը պետք է լինեն Հայաստանի Հանրապետությունում մարզված կամ Հայաստանի ազգային/տարբեր տարիքային հավաքականների անդամներ: Խաղադաշտում միաժամանակ պետք է լինեն Հայաստանի Հանրապետությունում մարզված կամ Հայաստանի ազգային/տարբեր տարիքային հավաքականների անդամ առնվազն 3 ֆուտբոլիստներ»:
Ակումբներին առաջարկվել էր առաջիկա մրցաշրջանում կատարել հետևյալ փոփոխությունը՝ խաղի արձանագրությունում 9-ի փոխարեն 10, խաղադաշտում 3-ի փոխարեն 4 ֆուտբոլիստ: Ակումբներից ստացել ենք հետևյալ պատասխանները.
– «Նոա», «Ալաշկերտ», «Արարատ», «Գանձասար», «Արարատ Արմենիա» և «Վան» թիմերը դեմ են արտահայտվել խաղադաշտում հայ ֆուտբոլիստների քանակի ավելացմանը և առաջարկել են նախկին կարգավորումները թողնել անփոփոխ:
– «Ուրարտու», «Փյունիկ», «Սարդարապատ», «Հայք», «Սյունիք» և «Անդրանիկ» ակումբները կողմ են արտահայտվել առաջարկվող փոփոխությանը: Քննարկման ընթացքում առաջարկվող փոփոխությանը կողմ է արտահայտվել նաև «Շիրակը»: Բավական հետաքրքիր և նոր առաջարկներ է ներկայացրել հատկապես «Ուրարտուն»:
Հայաստանի ֆուտբոլի ֆեդերացիան այս հարցը մշտապես պահում է ուշադրության կենտրոնում: Ակումբները նույնպես շատ հաճախ բարձրաձայնում են այն և ունենում են տարբեր տեսակետներ: Այս թեման բավականին կարևոր է և պահանջում է մանրակարկիտ և մասնագիտական լայն քննարկումներ։
Հայաստանի ազգային հավաքականի առաջիկա հանդիպումից հետո կրկին կվերադառնանք տվյալ հարցին։ Այն կքննարկվի Գործկոմի նիստի ընթացքում՝ ներկայացնելով գործադիր կոմիտեի անդամներին ակումբների դիրքորոշումները»,- նշված է հաղորդագրության մեջ։
