05.04.2026 | 21:21
Բախվել են VAZ և KIA մակնիշների ավտոմեքենաները․ կան տուժածներ և զոհ
Թուրք-իրանական առևտրատնտեսական հարաբերությունները կշարունակեն անարգել զարգանալ
Քաղաքականություն
15.11.2018 | 19:44
Չնայած Իրանի նկատմամբ կիրառվող ամերիկյան տնտեսական պատժամիջոցներին՝ թուրք-իրանական առևտրատնտեսական հարաբերությունները կշարունակեն զարգանալ։ Իսկ այդ հարաբերությունների ամրապնդման գործում կարևոր դեր կխաղա Իրանի հյուս-արևմուտքում գտնվող Արևելյան Ադրբեջան նահանգում հիմնված Արեզ ազատ առևտրի գոտին. փոխանցում է ermenihaber-ը:
Նման տեսակետ է հայտնել Արեզի տնօրեն Մուհսին Ներիմանը՝ ընդգծելով, որ պատժամիջոցների մեջ չընդգրկված 8 երկրներից Իրանի համար ամենակարևորը Թուրքիան է։ Իրանը Թուրքիայից է գնում արտադրության մեջ օգտագործվող հումքի նշանակալի մասը, իսկ թուրքական ընկերությունները կազմում են Իրանի հետ առևտրում պատժամիջոցներից զերծ օտարերկրյա ընկերությունների 30 տոկոսը։
Թավրիզի պլանավորման և կառավարման կազմակերպության նախագահ Դավութ Բեհբուդին էլ հիշեցրել է, որ թուրք-իրանական առևտրատնտեսական հարաբերությունները շատ ամուր հիմք ունեն և ամերիկյան պատժամիջոցները դրանց վրա գործնականում գրեթե չեն կարող ազդել։
Ըստ նրա՝ թուրքական և իրանական կողմի ընկերությունները շարունակում են հավատարիմ մնալ ավելի վաղ կնքված առևտրային պայմանագրերին։ Բեհբուդին համոզմունք է հայտնել, որ Թուրքիան և Իրանը իրենց սեփական դրամական միավորներով և սեփական բանկային կանոնների շրջանակներում կարող են ավելի խթանել երկկողմ առևտրային հարաբերությունները։
Նշենք, որ ավելի վաղ Թուրքիայի նախագահ Ռեջեփ Թայիփ Էրդողանը դեմ էր արտահայտվել ԱՄՆ-ի կողմից Իրանի դեմ կիրառվող պատժամիջոցներին։ Իրանի կառավարությունն էլ իր հերթին բազմիցս ընդգծել է, որ Թուրքիան միշտ կանգնած է իրենց կողքին և որ թուրք-իրանական առևտրատնտեսական հարաբերությունները այս պատժամիջոցներից որևէ կերպ չեն տուժի։
