30.09.2026 | 21:27
«Դարի կողոպուտը». Էրդողանի բարձրաստիճան կուսակցի ակտիվները սառեցվում են ներդրումային ֆոնդի շուրջ սկանդալի ֆոնին
Արեգ Վաթյան․ Այս տարվա գլխավոր նպատակը հստակ է
18.03.2026 | 13:30
2026թ․ Եվրոպայի C դիվիզիոնի առաջնությունում բասկետբոլի Հայաստանի մինչև 18 տարեկանների հավաքականը կգլխավորի Արեգ Վաթյանը։
Մրցաշարը կանցկացվի հուլիսի 21-26-ին Ալբանիայի Շկոդրա քաղաքում։ Հայաստանի հավաքականն ընդգրկված է A ենթախմբում և կմրցի Կոսովոյի, Անդորրայի և Ջիբրալթարի հավաքականների հետ։
ՀԲՖ մամուլի ծառայության հետ զրույցում գլխավոր մարզիչը ներկայացրել է թիմի ձևավորման մոտեցումները և առաջիկա նպատակները։
«Այս տարվա Մ18 հավաքականի հիմքը ձևավորվել է դեռ Մ16 հավաքականում, և այսօր մենք աշխատում ենք արդեն ձևավորված կազմի հետ։ Սա հնարավորություն է տալիս ավելի կազմակերպված կառուցել խաղը և արագ մարտավարություններ մտածել։
Կազմի ընտրության ժամանակ կարևորում եմ ինչպես խաղային որակը, այնպես էլ փորձը։ Հատկապես կարևոր են այն խաղացողները, ովքեր արդեն մասնակցել են միջազգային մրցաշարերի։
Մեր նպատակն է ունենալ հավասարակշռված կազմ՝ երկու մրցունակ հնգյակներով, որպեսզի կարողանանք պահպանել խաղի տեմպն ամբողջ հանդիպման ընթացքում։
Միևնույն ժամանակ հետևում եմ նաև Հայաստանի Մ18 առաջնությանը՝ տեսնելու համար, թե ովքեր կարող են ուժեղացնել հավաքականը։
Այս տարվա գլխավոր նպատակը հստակ է՝ հաղթահարել C դիվիզիոնը և տեղափոխվել B դիվիզիոն։
Անցյալ տարին բավական բարդ էր․ Մ20 առաջնությունը անցկացվում էր Երևանում, և մի շարք խաղացողներ միաժամանակ ներգրավված էին երկու հավաքականներում։ Դա ազդեց Մ18 հավաքականի նախապատրաստման վրա, և մենք չհասցրինք լիարժեք պատրաստվել։
Այնուամենայնիվ, թիմը պատվով հանդես եկավ և նվաճեց բրոնզե մեդալներ, ինչը այդ տարիքային խմբում կարևոր արդյունք էր։ Բայց համոզված եմ՝ մենք կարող էինք ավելիին հասնել, եթե ունենայինք ավելի շատ ժամանակ:
Այս տարի ունենք բոլոր նախադրյալները՝ ավելի բարձր արդյունք գրանցելու համար»,- նշել է Արեգ Վաթյանը:
