30.09.2026 | 12:02
Եվրոպայում կեղծ սմարթֆոնների վաճառքի խոշոր սխեմա է բացահայտվել․ վնասը գնահատվում է 300 մլն եվրո
Մկրտիչ եպիսկոպոս Պռոշյանի տնային կալանքը վերացվեց․ նա չի կարող շփվել Արագածոտնի թեմի հոգևորականների հետ
Հասարակություն
17.03.2026 | 16:55
Արագածոտնի թեմի առաջնորդ Մկրտիչ եպիսկոպոս Պռոշյանի խափանման միջոց տնային կալանքը վերացվել է։ Որպես այլընտրանքային խափանման միջոց բացակայելու արգելքի հետ համատեղ դատարանը նրա նկատմամբ կիրառեց վարչական հսկողություն։
Վարչական հսկողության ժամանակահատվածում Մկրտիչ եպիսկոպոս Պռոշյանը պարտավոր է շաբաթը մեկ անգամ գրանցվել պրոբացիայի ծառայությունում։
Միաժամանակ, դատարանը սահմանեց մի շարք սահմանափակումներ․ մեղադրյալին արգելվում է առանց վարույթն իրականացնող մարմնի թույլտվության փոխել մշտական բնակության վայրը՝ Արմավիրի մարզի Վաղարշապատ համայնքում։ Նրան նաև արգելվել է հաղորդակցվել տվյալ վարույթով անցնողների և Արագածոտնի թեմի հոգևորականների հետ։
Բացի այդ, եպիսկոպոսին արգելվել է այցելել թեմի նստավայր, ինչպես նաև Արագածոտնի մարզում գտնվող Հայ Առաքելական Սուրբ եկեղեցիներ։
Նշենք, որ Մկրտիչ եպիսկոպոս Պռոշյանը Ամենայն հայոց կաթողիկոսի քրոջ որդին է։ Եպիսկոպոսը կալանավորվել էր 2025-ի հոկտեմբերին Արագածոտնի թեմի առաջնորդարանում քննչական գործողություններից հետո։ Նա մեղադրվում է քրեական օրենսգրքի երկու հոդվածներով՝ իշխանական կամ ծառայողական լիազորությունները օգտագործելով ընտրական իրավունքին խոչընդոտելը և հավաքներին մասնակցելուն հարկադրելը՝ կրկին լիազորություններն օգտագործելով:
Վկաներից մեկի ցուցմունքի համաձայն՝ 2021 թվականի ընտրություններից առաջ Մկրտիչ եպիսկոպոս Պռոշյանը քահանաներին ասել է՝ խորհուրդ եմ տալիս՝ ում ուզում եք ընտրեք, Նիկոլ Փաշինյանին մի՛ ընտրեք։
Նշենք, որ ՔԿ-ն վարույթը նախաձեռնել էր «Իրազեկ քաղաքացիների միավորում» ՀԿ-ի հաղորդման հիմա վրա, որի հիմքում Հովհաննավանքի հոգևոր հովիվ Տեր Արամ քահանա Ասատրյանի՝ Հանրային հեռուստաընկերությանը տված հարցազրույցն էր, որտեղ նա պնդել էր, որ մասնակցել է ընդդիմության 2021 թվականի գրեթե բոլոր ցույցերին, բայց ոչ թե իր կամքով, այլ վերադասի։
Հավելենք, որ Մկրտիչ եպիսկոպոս Պռոշյանը մեղադրանքը չի ընդունում։
Արփի Հակոբյան
