02.07.2026 | 22:37
Վթարային ջրանջատում` Արարատի մարզում
Ավստրիայի Սանկտ Փյոլթըն քաղաքում մեկնարկել է Եպիսկոպոսաց հավաքը
Քաղաքականություն
18.02.2026 | 13:03
Մայր Աթոռ սուրբ Էջմիածնի տեղեկատվական համակարգից հայտնում են, որ երեկ՝ փետրվարի 17-ին, Ավստրիայի Սանկտ Փյոլթըն քաղաքում իր աշխատանքներն է սկսել Եպիսկոպոսաց հավաքը, որին մասնակցում էին Հայաստանյայց Առաքելական Սուրբ Եկեղեցու Ամենայն Հայոց Կաթողիկոսության քսանհինգ արքեպիսկոպոսներ և եպիսկոպոսներ, այդ թվում` Երուսաղեմի և Կոստանդնուպոլսի Հայոց Պատրիարքություններից։
«Առավոտյան ժողովականները մասնակցեցին Արևագալի ժամերգությանը։ Հոգևոր խորհրդածությունից և աղոթական առանձնացումից հետո հետմիջօրեի մեկնարկեց հավաքը։
Եպիսկոպոսաց հավաքը բացվեց Տերունական աղոթքով, որին հաջորդեց միասնության մասին Պողոս առաքյալի՝ եփեսացիներին ուղղված նամակից ընթերցումը։ Ապա ժողովականներին հայրական իր խոսքն ու պատգամն առցանց հղեց Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը։
Այնուհետև մասնակիցներին իրենց ուղերձը հղեցին նաև Ն.Ս.Օ.Տ.Տ. Արամ Ա Մեծի Տանն Կիլիկիո Կաթողիկոսը, Երուսաղեմի Հայ Պատրիարք Ամենապատիվ Տ. Նուրհան արքեպիսկոպոս Մանուկյանը և Կոստանդնուպոլսի Հայոց Պատրիարք Ամենապատիվ Տ. Սահակ արքեպիսկոպոս Մաշալյանը։
Օրակարգի քննարկումից և հաստատումից հետո ընտրվեց դիվանը՝ վարելու Եպիսկոպոսաց հավաքի հետագա աշխատանքները։
Նույն օրը Սանկտ Փյոլթընի Մայր Տաճարում եպիսկոպոսաց մասնակցությամբ տեղի ունեցավ Երեկոյան ժամերգություն, որի առիթով նրանց իր ողջույնի խոսքը հղեց Կաթոլիկ Եկեղեցու Սանկտ Փյոլթընի թեմի առաջնորդ Գերաշնորհ Ալոիս եպիսկոպոս Շվարցը»,- ասված է հաղորդագրությունում։
Հիշեցնենք՝ հունվարի 19-ին հայտնի դարձավ, որ կաթողիկոս Գարեգին Բ-ի գլխավորությամբ եպիսկոպոսաց ժողովը տեղի կունենա ոչ թե Մայր Աթոռ Սուրբ Էջմիածնում, այլ Ավստրիայում։
Մայր Աթոռի տեղեկատվական համակարգի տնօրեն Տեր Եսայի քահանա Արթենյանի խոսքով՝ նման որոշում են կայացրել՝ «հաշվի առնելով եկեղեցու դեմ սանձազերծած արշավն ու եկեղեցականների նկատմամբ հնարավոր ճնշումները»։
Կաթողիկոսի հրաժարականը պահանջող, «եկեղեցու բարենորոգման» օրակարգի միացած Տեր Գևորգ եպիսկոպոս Սարոյանը, այնինչ, այլ ենթատեքստ էր առաջ քաշում. «Ավստրիայում, որովհետև վախ կա, որ իր եղբայրը՝ Եզրաս սրբազանը, չի կարող գալ Հայաստան: Այդ վախը կա»։
Վախ կա, որ եղբայրը՝ Եզրաս Սրբազանը չի կարող գալ ՀՀ․ եպիսկոպոսը՝ ժողովն Ավստրիայում անցկացնելու մասին
Փետրվարի 14-ին էլ հայտնի դարձավ, որ Քննչական կոմիտեն «բացակայելու արգելք» խափանման միջոցն է ընտրել Ամենայն հայոց կաթողիկոս Գարեգին Բ-ի համար։ Պատճառը հարուցված քրեական գործն է։ Քննչական կոմիտեի փոխանցմամբ՝ կաթողիկոսի նկատմամբ հանրային քրեական հետապնդում է հարուցվել դատական ակտի կատարմանը խոչընդոտելու հոդվածով:
