30.09.2026 | 21:27
«Դարի կողոպուտը». Էրդողանի բարձրաստիճան կուսակցի ակտիվները սառեցվում են ներդրումային ֆոնդի շուրջ սկանդալի ֆոնին
Մինչև 720 000 դրամ աշխատավարձի խոստում, ատեստավորման դժվարություններ. ՏԵՍԱՆՅՈՒԹ
Քաղաքականություն
10.02.2026 | 20:15
Ռազմական ակադեմիայում ուսանած և «Պաշտպան հայրենյաց» ծրագրով զինծառայության մեկնած զինվորականների ավարտական քննության արդյունքները կհամարվեն որպես ատեստավորման ցուցանիշ։ Զինծառայողները զորամասեր ծառայության կմեկնեն արդեն բարձրացված աշխատավարձերով։ Այս փոփոխությունն ԱԺ-ում նախորդ շաբաթ ներկայացրել էր Սուրեն Պապիկյանը։
Այս փոփոխությանը զուգահեռ՝ Factor TV-ն տևական ժամանակ է՝ Հայաստանի Զինված ուժերի թիկունքային ծառայողներից ահազանգեր է ստանում, որ ատեստավորման գործընթացը երեք տարի է՝ ձգձգվում է։ Զինծառայողներից մեկն անանուն մնալու պայմանով մեզ փոխանցեց, որ որևէ հիմնավոր բացատրություն չի տրվում, թե ինչու են իրենք զրկված ատեստավորման հնարավորությունից։ Ըստ նրա՝ ոմանք անցել են ատեստավորման համար նախատեսված քննությունների մի մասը և սպասման մեջ են։
Պաշտպանության նախարարությունը Factor TV-ի գրավոր հարցմանն ընդհանրական պատասխան է տվել՝ նշելով, որ ատեստավորման գործընթացը չի դադարեցվել։ Մենք հարցադրմամբ շեշտել էինք թիկունքայինների համար առաջացած խնդիրները, որոնց պաշտպանական գերատեսչությունն անդրադարձ չի կատարել։
ԱԺ պաշտպանության և անվտանգության հարցերի հանձնաժողովի անդամ, ՔՊ-ական պատգամավոր Արմեն Խաչատրյանը, մինչդեռ, նշում է՝ դիմողների առատության պայմաններում ծանրաբեռվածության պատճառով է, որ որոշ զինծառայողների ատեստավորումը ձգձգվում է։
Հանձնաժողովի մեկ այլ անդամ՝ ընդդիմադիր պատգամավոր Գեղամ Մանուկյանը ևս ահազանգեր է ստացել զինծառայողներից։
Իսկ ահա հանձնաժողովի նախագահ Անդրանիկ Քոչարյանը խիստ լավատես է։ Նա պնդում է՝ իրականությանը չեն համապատասխանում այն տեղեկությունները, որ թիկունքայինների համար ատեստավորման գործընթացը դանդաղում է։ Քոչարյանը, սակայն, նույն վստահությամբ չի կարող ասել, թե թիկունքից քանի զինծառայող է ատեստավորվել։
Factor TV-ին դիմած զինվորականներից մի քանիսը ռեպորտաժի պատրաստման ընթացքում տեղեկացրին, որ իրենց ատեստավորման գործընթացը կազմակերպելու վերաբերյալ արդեն հրամաններ են ստացվել։
Մանրամասները՝ տեսանյութում։
Նարեկ Կիրակոսյան
