04.04.2026 | 16:35
«Օրիոն»-ն անցել է դեպի Լուսին ճանապարհի կեսից ավելին
Հայաստանի նախաձեռնած բանաձևը միաձայն ընդունվել է ԱՀԿ գործադիր խորհրդի նիստում
09.02.2026 | 13:21
ՀՀ առողջապահության նախարարությունից հայտնում են, որ Առողջապահության համաշխարհային կազմակերպության գործադիր խորհրդի 158-րդ նիստի (158th session of the WHO Executive Board) շրջանակներում ՀՀ առողջապահության նախարարության միջազգային հարաբերությունների վարչության պետ Արմեն Մելքոնյանը հանդես է եկել ելույթներով, որոնք վերաբերում էին Հայաստանի նախաձեռնած «Հեմոֆիլիայով և արյան մակարդելիության այլ խանգարումներով անձանց համար առողջապահական հավասարության ապահովման գլոբալ գործողություններ» թեմայով բանաձևին:
Բանաձևը մշակվել է ՀՀ առողջապահության նախարարության և Հեմոֆիլիայի համաշխարհային ֆեդերացիայի կողմից:
Շնորհիվ ԱՀԿ անդամ պետությունների հետ անցկացված մի շարք խորհրդակցությունների և տարբեր երկրների հետ երկկողմ ձևաչափով հանդիպումների ժամանակ վարած բանակցությունների` ներկայացված նախագիծն ընդունվել է միաձայն:
2026 թ. մայիսին կայանալիք ԱՀԿ 79-րդ գլխավոր վեհաժողովին (WHA79) ԱՀԿ բոլոր 194 անդամ պետությունների կողմից վերջնական պաշտոնական ընդունմանը կհաջորդի բանաձևով սահմանված կետերի իրականացման փուլը` համաձայն 2026-2028 թթ. ժամանակահատվածի համար մշակված ճանապարհային քարտեզի։
Բանաձևի հաստատումը մի կողմից կնպաստի ամբողջ աշխարհում հեմոֆիլիայով և արյան մակարդելիության այլ խանգարումներով անձանց բուժման և խնամքի հասանելիության բարելավման ուղղությամբ գլոբալ և համակարգված շրջանակի ձևավորմանը, մյուս կողմից` Հայաստանում առողջապահության ոլորտի կարևորության ընդգծմանը, ԱՀԿ հարթակում Հայաստանի դերի արժևորմանը, երկկողմ և բազմակողմ ձևաչափով միջազգային գործակցության ամրապնդմանն ու համագործակցության մասշտաբների ընդլայնմանը, իսկ ավելի գլոբալ դիտանկյունից` Հայաստանի ճանաչելիության և վարկանիշի բարձրացմանը:
