07.09.2026 | 12:46
Ադրբեջանն ու Իրանը քննարկել են համատեղ նախագծերի իրականացման ընթացքը
«Լուկօյլ»-ը պայմանավորվել է վաճառել իր արտասահմանյան ակտիվներն ամերիկյան Carlyle-ին
Քաղաքականություն
29.01.2026 | 18:24
«Լուկօյլ»-ը իր արտասահմանյան ակտիվները վաճառելու պայմանագիր է կնքել ամերիկյան Carlyle ընկերության հետ, հաղորդում է ռուսական նավթային ընկերության մամուլի ծառայությունը։ Գնորդը կստանա «Լուկօյլ» ԲԲԸ դուստր ձեռնարկության 100%-ը, որը տիրապետում է «Լուկօյլ» խմբի արտասահմանյան ակտիվներին։ Գործարքը չի ներառում Ղազախստանում գտնվող ակտիվները, որոնք կմնան «Լուկօյլի» սեփականությունը, գրում է Meduza-ն։
Մամուլի ծառայությունը նշում է, որ ամերիկյան ընկերության ակտիվների վաճառքը դեռևս պահանջում է ԱՄՆ Ֆինանսների նախարարության Արտասահմանյան ակտիվների վերահսկողության գրասենյակի (OFAC) հաստատումը։
«Ընկերությունը նաև շարունակում է քննարկումներն այլ պոտենցիալ գնորդների հետ»,- նշվում է մամուլի հաղորդագրության մեջ։
Carlyle ներդրումային ընկերությունը դառնում է ռուսական ընկերության ակտիվների հավակնորդներից մեկը՝ Gunvor-ի հետ գործարքի ձախողումից հետո։ Աշխարհի խոշորագույն մասնավոր ներդրումային ընկերություններից Carlyle-ը կառավարում է 474 միլիարդ դոլարի ակտիվներ։
Ամերիկյան «Chevron» նավթային ընկերությունը նույնպես հիշատակվում էր որպես հավանական գնորդ։
2025 թվականի հոկտեմբերի վերջին ԱՄՆ-ը պատժամիջոցներ կիրառեց «Լուկօյլ»-ի նկատմամբ, ինչը ընկերությանը դրդեց գնորդ փնտրել իր արտասահմանյան ակտիվների համար: Ռուսական ընկերությունը համաձայնության էր եկել նավթային առևտրով զբաղվող Gunvor-ի հետ, որը հիմնադրվել էր շվեդ գործարար Թորբյորն Թյորնկվիստի և Վլադիմիր Պուտինի ընկեր Գենադի Տիմչենկոյի կողմից: Սակայն գործարքը չեղյալ հայտարարվեց, երբ ԱՄՆ Ֆինանսների նախարարությունը հայտարարեց, որ «Կրեմլի խամաճիկ Gunvor-ը երբեք լիցենզիա չի ստանա գործելու և շահույթ ստանալու համար», և այն հետ վերցրեց «Լուկօյլ»-ի ակտիվները գնելու իր առաջարկը:
Թարգմանությունը՝ Էմմա Չոբանյանի
