Ֆուտզալի Հայաստանի ազգային հավաքականի գլխավոր մարզիչ Ռուբեն Նազարեթյանը մեկնաբանել է Եվրոպայի առաջնության խմբային փուլի վերջին տուրի խաղում Լիտվայի հավաքականի հետ 3։3 հաշվով ոչ-ոքին։
«Շատ դժվար հանդիպում էր։ Մենք մի քանի փոփոխություն կատարեցինք մեր կազմում։ Ցանկանում էինք հաղթել այս խաղում, բայց չկարողացանք խփել հաղթական գոլը։ Հետ նայելով խմբային փուլին՝ մենք շատ լավ խաղացինք բոլոր երեք խաղերում։ Շատ լավ տրամադրությամբ ենք մոտենում Խորվաթիայի հավաքականի դեմ խաղին»,- մարզիչի խոսքը մեջբերում է ՈՒԵՖԱ-ի մամուլի ծառայությունը։
Լատվիայում, Լիտվայում և Սլովենիայում անցկացվող Եվրո-2026-ի B խմբում Հայաստանի հավաքականը 7 միավորով գրավել էր առաջին տեղը և դուրս եկել քառորդ եզրափակիչ, որտեղ կմրցի A խմբում երկրորդ տեղը զբաղեցրած Խորվաթիայի հավաքականի հետ։ Հանդիպումը կկայանա հունվարի 31-ին Լիտվայի Կաունաս քաղաքի «Ժալգիրիս Արենա» մարզապալատում ու կմեկնարկի Երևանի ժամանակով 22։00-ին։ Նախորդ երկու խաղում հայ ֆուտզալիստները հաղթել էին 2024թ․ աշխարհի առաջնության բրոնզե մեդալակիր Ուկրաինայի (2:1) ու Չեխիայի (5։4) հավաքականներին։
Լուսանկարը՝ ՀՖՖ-ի։
