Շքեղ մեքենաները պատժամիջոցների շրջանցմամբ շարունակում են ներմուծվել ՌԴ, այդ թվում՝ Հայաստանի ընկերությունների միջոցով

Չնայած Մոսկվայի կողմից Ուկրաինա ներխուժումից հետո Ռուսաստան շքեղ մեքենաների և լյուքս դասի այլ ապրանքների ներմուծման համար սահմանված պատժամիջոցներին՝ երկիր շարունակում են ներմուծվել պրեմիում դասի  մեքենաներ, գրում է Current time-ը։

TriTrace Investigations-ի հետաքննության համաձայն՝ 2022 թվականի մարտից ի վեր Ռուսաստան է ներմուծվել առնվազն 214 Bentley, Ferrari, Lamborghini, Maserati և Rolls-Royce մեքենա՝ 5,9 միլիարդ ռուբլի (ավելի քան 75 միլիոն դոլար) արժողությամբ՝ խախտելով պատժամիջոցները: Նշվում է, որ պատժամիջոցներից խուսափելու համար օգտագործվում են Ղազախստանի, Բելառուսի, Հայաստանի և այլ երկրների ընկերություններ:

TriTrace թիմը գլխավորում է «Transparency International – Russia»-ի նախկին տնօրեն Իլյա Շումանովը: Բյուրոյի վերլուծությունը հիմնված է Եվրասիական տնտեսական միության (ԵԱՏՄ) սահմանով ապրանքների տեղաշարժի վերաբերյալ տվյալների վրա, որը ներառում է Ռուսաստանը, Բելառուսը, Ղազախստանը, Հայաստանը և Ղրղզստանը։

TriTrace-ի հետաքննիչներն ընդգծում են, որ պատերազմի սկսվելուց հետո Ռուսաստան են ներմուծվել բազմաթիվ թանկարժեք մեքենաներ, որոնք պատվիրվել են պետությանը մոտ կանգնած անձանց կողմից՝ օլիգարխների և արևմտյան պատժամիջոցների տակ գտնվող պետական ​​կապալառուների, պաշտպանական արդյունաբերության ղեկավարների և բռնակցված Ղրիմի ներկայացուցիչների կողմից։

Պատերազմի սկզբից ի վեր բոլոր մատակարարումների ավելի քան 80%-ը ստացվել է «Ավտոդոմի» ՍՊԸ-ի կողմից, որը Ռուսաստանում պրեմիում դասի մեքենաների խոշորագույն ներմուծողն է: Ընկերությունը պատկանում է Անդրեյ Օլխովսկուն, որը 2025 թվականի փետրվարից գտնվում է Մեծ Բրիտանիայի պատժամիջոցների տակ:

2024 թվականի Bentley Bentayga-ն, որի արժեքը 27,25 միլիոն ռուբլի է, հավանաբար, ներմուծվել է «Ռուսական ուղղաթիռներ» ընկերության փոխտնօրենի ընտանիքի համար: Արտահոսած տվյալների համաձայն՝ այս Bentley-ի ապահովագրությունը արված է «Վադիմ Լիգայ» ԲԲԸ-ի գլխավոր տնօրենի տեղակալի որդու վրա: Մեքենան Ռուսաստան է մատակարարվել Թուրքիայից և Բելառուսից միջնորդների միջոցով և գրանցվել է «Կազանի մեկնարկային գործարան» ԲԲԸ-ում: Այս ձեռնարկությունը ներառված է Արդյունաբերության և առևտրի նախարարության պաշտպանական ձեռնարկությունների փակ գրանցամատյանում և զբաղվում է Ալաբուգայի տնտեսական գոտում «Շահեդ» տիպի կամիկաձե անօդաչու թռչող սարքերի արտադրությամբ:

Մեկ այլ Bentley՝ 2023 թվականի Flying Spur Azure Hybrid-ը, որի արժեքը 19,9 միլիոն ռուբլի է, ներմուծվել է Ռուսաստան Բելառուսի միջոցով: Դրա ստացողը Integral LLC-ն էր, որը 100% պատկանում է Ղրիմի Գերագույն խորհրդի նախկին անդամ Ալեքսեյ Շացկիխին և կապված է «Крым Наш Парк» զբոսաշրջային նախագծի հետ: Այն ֆինանսավորվել է պատժամիջոցների տակ գտնվող РНКБ-ի կողմից:

Մեկ այլ մեքենա՝ 37 միլիոն ռուբլով արժողությամբ Lamborghini Urus-ը, գնվել է 385,000 եվրոյով Ղազախստանում գտնվող մի ընկերության միջոցով և գրանցվել է Եվգենի Զուբիցկու կնոջ անունով, որը ԵՄ պատժամիջոցների տակ գտնվող օլիգարխ է:

Հետաքննողների տվյալներով՝ շքեղ մեքենաները Ռուսաստան են ներմուծվել հիմնականում Բելառուսի (64 մեքենա), Թուրքիայի (45), Ղազախստանի (41), Իտալիայի (14) և Հայաստանի (10) միջոցով։ Մեքենաների կեսից ավելին (206-ից 116-ը) ներմուծվել է Եվրասիական տնտեսական միության երկրների միջոցով։

Թարգմանությունը՝ Էմմա Չոբանյանի