27.01.2026 | 14:54
«Բարսելոնայի» ֆուտբոլիստը տեղափոխվել է ՊՍԺ
Թրամփը հայտարարել է Հարավային Կորեայի համար մաքսատուրքերը մինչև 25% բարձրացնելու մասին
Քաղաքականություն
27.01.2026 | 12:20
ԱՄՆ նախագահ Դոնալդ Թրամփը հայտարարել է, որ Հարավային Կորեայից ապրանքների ներմուծման մաքսատուրքերը բարձրացնում է՝ 15-ից հասցնելով 25%-ի, գրում է CNN-ը։
«Քանի որ Կորեայի օրենսդիր մարմինը չի ընդունել մեր Պատմական առևտրային համաձայնագիրը, ինչը նրանց իրավասությունն է, ես բարձրացնում եմ Հարավային Կորեայից ավտոմեքենաների, փայտանյութի, դեղագործական և մյուս բոլոր փոխադարձ մաքսատուրքերի դրույքաչափը մինչև 25%-ի»,- գրել է Թրամփը Truth Social-ում։
Հստակ չէ, թե երբ են նոր մաքսատուրքերն ուժի մեջ մտնելու։
Սեուլը նախատեսում է «հանգիստ արձագանքել» և «պատրաստակամություն հայտնել՝ ԱՄՆ-ի հետ մաքսատուրքերի համաձայնագիրը կյանքի կոչելու» համար, հայտարարել է Հարավային Կորեայի նախագահի մամուլի խոսնակ Կանգ Յու Ջունգը։
Հարավային Կորեան ԱՄՆ-ի արտասահմանյան ապրանքների հիմնական աղբյուրներից է, որը 2024 թվականին Միացյալ Նահանգներ է առաքել 132 միլիարդ դոլարի ապրանքներ՝ ըստ Առևտրի նախարարության տվյալների: ԱՄՆ արտահանվող հիմնական ապրանքները ներառում են ավտոմեքենաներ և դրանց պահեստամասեր, ինչպես նաև կիսահաղորդիչներ և էլեկտրոնիկա: Այս ապրանքները կարող են թանկանալ բարձր մաքսատուրքերի պատճառով։
Թրամփի այս հայտարարությունը հաջորդում է վերջերս հնչած մի շարք սպառնալիքներին, այդ թվում՝ կանադական ապրանքների համար 100 տոկոս մաքսատուրքի և Գրենլանդիայի հետ կապված իր ծրագրերին դեմ արտահայտվող երկրներից ապրանքների համար լրացուցիչ 10 տոկոս մաքսատուրքի մասին։
Թարգմանությունը՝ Էմմա Չոբանյանի
