Քաղաքականություն
23.01.2026 | 16:42
ԱՄՆ նախագահ Դոնալդ Թրամփը, հնարավոր է, դուրս բերի զորքերը Սիրիայից, ինչպես ծրագրել էր պաշտոնավարման առաջին ժամկետի ընթացքում։ Wall Street Journal-ը (WSJ) գրում է, որ Վաշինգտոնը քննարկում է Սիրիայից դուրս գալու հարցը, քանի որ երկրի նոր կառավարությունը հարձակում է սկսում հյուսիսում ԱՄՆ-ի կողմից աջակցվող Սիրիայի դեմոկրատական ուժերի (SDF) դեմ, գրում է Middle East Eye-ը։
Այս քայլը Սիրիայի նախագահ Ահմեդ ալ-Շարաայի՝ 14-ամյա քաղաքացիական պատերազմի ընթացքում ձևավորված աշխարհազորայիններին զինաթափելու և զինյալներին ազգային բանակի մեջ ընդգրկելու ջանքերի մի մասն է։ Եթե քրդերի գլխավորած SDF-ն իսկապես փլուզվի, ամերիկացի զինվորները կարիք չեն ունենա մնալ Սիրիայում, ասել են WSJ-ի կողմից մեջբերված անանուն պաշտոնյաները։
Այսօր Սիրիայում տեղակայված է 800-ից 1000 ամերիկացի զինվորական։
Պաշտոնյաները հավելել են, որ սիրիական բանակի հետ համագործակցությունը կենսունակ չի լինի, քանի որ այնտեղ չափազանց շատ «ջիհադականների համակիրներ» կան և մարդիկ, որոնք զանգվածային սպանություններ են իրականացրել քուրդ և դրուզ փոքրամասնությունների նկատմամբ։
SDF-ի ժամանակին ամենաուժեղ ուժն էր «Իսլամական պետություն» խմբավորման զինյալների դեմ պայքարում։
SDF-ի և սիրիական բանակի միջև մարտերը նաև ամերիկացի զինվորներին են դրել թիրախում։ Դեկտեմբերին սիրիական բանակի անդամը, որը, ենթադրաբար, կապված է եղել ԻԼԻՊ-ի հետ, սպանել է երեք ամերիկացի զինծառայողի։
Քանի որ SDF-ն կորցնում է դիրքերը, այն նաև կորցնում է իր կողմից պահպանվող ճամբարների նկատմամբ վերահսկողությունը, որտեղ պահվում է ԻԼԻՊ-ի հետ կապված շուրջ 7000 կալանավոր։ Նրանցից շատերը կանայք և երեխաներ են, որոնց կառավարությունները չեն վերադարձնում իրենց ծագման երկրներ։ Կալանավորներին մեղադրանք չի առաջադրվել, նրանք դատական գործընթացով չեն տեղափոխվել։
Սիրիայում պահվող բանտարկյալների թվում կան 50 երկրների քաղաքացիներ, այդ թվում՝ Ֆրանսիայից, Եգիպտոսից, Մեծ Բրիտանիայից, Բելգիայից, Թունիսից, Գերմանիայից, Իրաքից, Շվեդիայից, Կանադայից, Ավստրալիայից և Նիդերլանդներից։
Չորեքշաբթի ԱՄՆ Կենտրոնական հրամանատարությունը (Centcom) սկսել է նրանցից 150-ի տեղափոխումը Իրաքի ճամբար: Centcom-ը հայտարարել է, որ ծրագիրը նախատեսում է բոլոր կալանավորներին վերջնականապես տեղափոխել Սիրիայից:
«Միացյալ Նահանգները ողջունում է Իրաքի կառավարության նախաձեռնությունը ԻԼԻՊ-ի ահաբեկիչներին Իրաքի անվտանգ վայրերում պահելու վերաբերյալ՝ Սիրիայի հյուսիս-արևելքում վերջերս տեղի ունեցած անկայունությունից հետո»,- հայտարարել է ԱՄՆ պետքարտուղար Մարկո Ռուբիոն։
Հունվարի 20-ին Սիրիայի հարցերով ԱՄՆ հատուկ դեսպան Թոմ Բարաքը հայտարարել էր, որ «SDF-ի՝ որպես տեղում ԻԼԻՊ-ի դեմ պայքարի հիմնական ուժի սկզբնական նպատակը մեծ մասամբ սպառվել է»։
Թարգմանությունը՝ Էմմա Չոբանյանի
