Քաղաքականություն
08.11.2018 | 20:49
ՀՀ կրթության և գիտության նախարարի պաշտոնակատար Արայիկ Հարությունյանի հրամանով դիրիժոր, «Հովեր» երգչախմբի հիմնադիր-ղեկավար, արվեստի վաստակավոր գործիչ Սոնա Հովհաննիսյանը նշանակվել է Երևանի Կոմիտասի անվան պետական կոնսերվատորիայի ռեկտորի պաշտոնակատար:
Factor.am-ին հայտնի դարձավ, որ այս նշանակումը ՔՊ-ականների սրտով չէ, և նեղ շրջանակներում դարձել է բուռն քննարկման թեմա:
Մեր աղբյուրի փոխանցմամբ՝ դժգոհության պատճառն այն է, ոչ Հովհաննիսյանը հեղափոխության օրերին իր երգչախմբի անդամներին թույլ չի տվել դուրս գալ փողոց և արտահայտել իրենց քաղաքական դիրքորոշումը:
Անգամ սպառնացել է աշխատանքից ազատելով: Այս տեղեկությունների վերաբերյալ Factor.am-ը մեկնաբանություն խնդրեց Սոնա Հովհաննիսյանից:
«Տեղեկությունները ճիշտ չեն, որովհետև իմ ամբողջ երգչախումբն այդ օրերին եղել է դրսում, եղել է ցույցերի մեջ: Ես որևէ իրավունք չունեմ բռնանալու, այդպիսի բան տեղի չի ունեցել: ՔՊ-ի անդամ է իմ երգիչներից Արթուր Մանուկյանը, ես ինչպե՞ս կարող էի բռնանալ: Դժգոհություններ կան, տարբեր կարծիքներ կարող են լինել յուրաքանչյուր գործչի մասին, ով հանրային գործունեություն է ծավալում: Ես չեմ պատրաստվում հակառակն ապացուցել»,- ասաց նա:
ՔՊ-ական մեր աղբյուրը փոխանցել էր, որ Հովհաննիսյանն աշխատակիցներին թույլ չի տվել դուրս գալ փողոց, քանի որ Ռիտա Սարգսյանի մտերիմն է: Մեզ հետ զրույցում Սոնա Հովհաննիսյանը չհերքեց, որ Սերժ Սարգսյանի տիկնոջ հետ համագործակցել է: «Նախկին կառավարության ժամանակ ես շատ գնահատված եմ եղել, և դա փաստացի է եղել: Մեր երգչախումբն ունեցել է շատ բարձր կարգ: Շատ բան կարող է փոխվել, բայց արվեստի բնագավառում նույնն է մնում: Ինչ վերաբերվում է իմ մտերմությանը, ապա ես ունեցել եմ զուտ գործնական առաջարկներ նրա կողմից, որոնք վերաբերել են Շուշիի բացօթյա օպերաներին։ Այդ առաջարկները ես իրականացրել եմ, ու վճարվել է երգչախումբը»,- նշեց նա: Մամուլի արխիվներից տեղեկանում ենք, որ Սոնա Հովհաննիսյանի ղեկավարած երգչախումբը միշտ մասնակցություն է ունեցել Ռիտա Սարգսյանի հետ փոխկապակցված միջոցառումներին: Անգամ նշված է, որ համերգները կազմակերպվել են Ռիտա Սարգսյանի բարձր հովանու ներքո:
Հայկ Վարդանյան
