Իրավապաշտպանները հայտնում են Իրանում բողոքի ցույցերի հետևանքով 2 571 զոհի մասին. ըստ որոշ աղբյուրների՝ զոհերի թիվը հասել է 12 000-ի

Իրանում բողոքի ցույցերի հետևանքով զոհերի թիվը հասել է 2571-ի, հայտնել է ԱՄՆ-ում գործող HRANA իրավապաշտպան խումբը, գրում է Reuters-ը:

Խումբը հայտարարել է, որ մինչ այժմ նույնականացրել է 2403 ցուցարարների, կառավարության հետ կապված 147 անձանց, 18 տարեկանից փոքր 12 անձանց և 9 ոչ ցուցարար քաղաքացիական անձանց մահը։

Երեքշաբթի իրանցի պաշտոնյան Reuters-ին հայտնել էր շուրջ 2000 մարդու զոհվելու մասին, ինչն առաջին դեպքն է, երբ իշխանության ներկայացուցիչը հայտնում է երկու շաբաթից ավելի տևած համազգային անկարգությունների զոհերի ընդհանուր թիվը։

ԱՄՆ նախագահ Դոնալդ Թրամփը երեքշաբթի կոչ էր արել իրանցիներին շարունակել բողոքի ցույցերը՝ հայտարարելով՝ «օգնությունը ճանապարհին է»։ Սակայն իրանցի պաշտոնյաներն ԱՄՆ-ին և Իսրայելին մեղադրել են երկրում բռնություն  հրահրելու մեջ, իսկ մահերի համար մեղադրել են «ահաբեկչական գործակալներին», որոնք ստացել են օտարերկրյա ուղղորդում հրահրումների համար։

Հարցին՝ ի՞նչ է նկատի ունցել «օգնությունը ճանապարհին է» ասելով, Թրամփը լրագրողներին պատասխանել է, որ նրանք պետք է պարզեն դա։ Նա ասել է, որ ռազմական գործողություններն այն տարբերակներից են, որոնք դիտարկում է Իրանին պատժելու համար՝ բռնաճնշումների համար։

Երկու աղբյուրներ, այդ թվում՝ մեկը՝ Իրանի ներսում, CBS News-ին հայտնել են, որ զոհվել է առնվազն 12,000, հնարավոր է նույնիսկ՝ մինչև 20,000 մարդ։ Ակտիվիստների խմբերն աշխատում են կազմել մահացածների ամբողջական ցանկը՝ հիմնվելով երկրի ամբողջ տարածքում բժշկական ոլորտի պաշտոնյաների հաղորդագրությունների վրա։ CBS News-ը չի կարողացել անկախ կերպով ստուգել իրանական աղբյուրի կողմից նշված մահերի թիվը։

Հրապարակման մեջ նշվում է, որ անկարգությունները, որոնք առաջացել են ծանր տնտեսական պայմանների հետևանքով, առնվազն երեք տարի Իրանի կառավարիչների համար ամենամեծ ներքին մարտահրավերն են և տեղի են ունեցել անցյալ տարի Իսրայելի ու ԱՄՆ-ի կողմից իրականացված հարվածներից հետո միջազգային ճնշման ուժեղացման ժամանակաշրջանում։

Թարգմանությունը՝ Էմմա Չոբանյանի