24.06.2026 | 12:03
Ալիևը Հայաստանին մեղադրել է իսլամական կրոնական և մշակութային հուշարձանները «ոչնչացնելու» մեջ
Իրանցի պաշտոնյան հայտարարել է անկարգությունների ընթացքում շուրջ 2000 զոհի մասին
Քաղաքականություն
13.01.2026 | 16:48
Իրանում բողոքի ցույցերի ժամանակ շուրջ 2000 մարդ է զոհվել, այդ թվում՝ անվտանգության աշխատակիցներ, հայտարարել է իրանցի պաշտոնյան։ Սա առաջին դեպքն է, երբ իշխանությունները խոստովանում են երկշաբաթյա համազգային անկարգությունների ինտենսիվ ճնշման հետևանքով զոհերի մեծ թվի մասին, գրում է Reuters-ը։
Իրանցի պաշտոնյան գործակալության հետ զրույցում ասել է, որ ինչպես ցուցարարների, այնպես էլ անվտանգության աշխատակիցների մահվան հետևում կանգնած են մարդիկ, որոնց նա անվանել է «ահաբեկիչներ»: Պաշտոնյան չի մանրամասնել, թե ովքեր են զոհվել:
Ըստ հրապարակման՝ Իրանի հոգևորական իշխանությունները, որոնք իշխանության են 1979 թվականի Իսլամական հեղափոխությունից ի վեր, փորձել են երկակի մոտեցում ցուցաբերել ցույցերի նկատմամբ՝ տնտեսական խնդիրների շուրջ բողոքի ցույցերը համարելով օրինական, միաժամանակ կիրառելով անվտանգության խիստ միջոցներ: Նրանք մեղադրել են ԱՄՆ-ին և Իսրայելին անկարգություններ հրահրելու մեջ՝ ասելով, թե անանուն անձինք զավթել են բողոքի ցույցերը:
Նշվում է, որ իրավապաշտպան խումբը նախկինում նույնականացրել է հարյուրավոր սպանվածների, նաև հայտարարել, որ հազարավոր մարդիկ ձերբակալվել են։
Հաղորդակցության միջոցների սահմանափակումները, այդ թվում՝ վերջին օրերին ինտերնետի անջատումը, խոչընդոտում են տեղեկատվություն ստանալուն։
Անցած շաբաթվա ընթացքում ցուցարարների և անվտանգության ուժերի միջև գիշերային բախումների տեսանյութերը, այդ թվում՝ մի քանիսը, որոնք ստուգվել են Reuters-ի կողմից, ցույց են տվել բախումներ՝ կրակոցներով, մեքենաների և շենքերի այրմամբ։
Թարգմանությունը՝ Էմմա Չոբանյանի
