Ինչն է փոխհատուցվում, ինչը՝ ոչ․ թոշակառուների համար ապահովագրության մեխանիզմը դեռ հստակ չէ. ՏԵՍԱՆՅՈՒԹ

73-ամյա թոշակառու Անուշ Վարդանյանը պոլիկլինիկայից հեռանում է առանց հետազոտություններն անցնելու։ Ասում է՝ չգիտի, թե թվարկած ծախսերը առողջության համընդհանուր ապահովագրության դեպքում փոխհատուցվելո՞ւ են, թե՞ ոչ։ 

Անուշ Վարդանյանը դեկտեմբերին անգամ դիմել է քաղաքապետարան՝ առողջական ծախսերի համար աջակցություն ստանալու նպատակով։ Սակայն կառույցից հայտնել են՝ ֆինանսական աջակցություն ծրագիր չունեն։

«55 տարի աշխատել եմ դպրոցում, պետության գանձարանը ես գումար եմ դրել,  հիմա օգտվում եմ որոշ արտոնություններից, բայց այդ անալիզների գումարը չունեի։  Ամիսը մի անգամ աչք եմ սրսկում՝ 30 հազարով, իմ թոշակը տեղավորվում է աչք սրսկելուն, կոմունալին, և որ սոված չմնամ»,- ասում է մեր զրուցակիցը։ 

Քաղաքացիներից ոմանք տեղյակ չէին ապահովագրության կարգից, պոլիկլինիկա էին եկել՝ մանրամասներին ծանոթանալու, ոմանք էլ արդեն տեղյակ էին։  

Պոլիկլինիկա մեր այսօրվա այցը ցույց տվեց․ այցելուների մեծ մասը տարեցներ են, իսկ հիմնական նպատակը՝ հասկանալ, թե ինչ ծառայություններից կարող են օգտվել ապահովագրության շրջանակում։

Սքրինինգային հետազոտություններ, սիրտ-անոթային անհետաձգելի վիրահատություններ, անհրաժեշտ ծախսերի փոխհատուցում․ Պետական առողջապահական գործակալության պետ Սամվել Խարազյանը վստահեցնում է՝ ապահովագրությունը փոխհատուցում է հիմնական տարածված հիվանդությունների կանխարգելման ու բուժման ծախսերը։ Խարազյանի խոսքով՝ 65-ից բարձր տարիքի որոշ անձինք արդեն իսկ օգտվել են համընդհանուր ապահովագրության համակարգի ընձեռած հնարավորություններից։

Ապահովագրության շրջանակում անհրաժեշտ ծառայությունները մատուցելու համար բուժհաստատությունը պետք է պայմանագիր ունենանա հիմնադրամի հետ։ Այս պահին ոչ բոլոր բժշկական կազմակերպությունները նման պայմանագիր ունեն։

Այսօր ժամը 18:45-ի դրությամբ՝ առողջության համընդհանուր ապահովագրության  համակարգով գրանցվել է 40,724 այց, որից 34,984-ը պոլիկլինիկաներ գրանցված այցերն են։ 

Մանրամասները՝ տեսանյութում։

Անի Թամրազյան