Թորոսյանի պնդումը և վիճակագրությունը․ ՀՀ-ում կին աշխատողներն ավելի շատ են, բայց միայն մի քանի ոլորտներում

Աշխատանքի և սոցիալական հարցերի նախարար Արսեն Թորոսյանն այսօր հայտարարել է, որ ՀՀ-ում կին աշխատողներն ավելի շատ են, քան տղամարդիկ։ Համադրումը ցույց է տալիս, որ այս պնդումը համընկնում է ՀՀ վիճակագրական կոմիտեի հրապարակած տվյալների հետ։ Միևնույն ժամանակ, այն պարզաբանման կարիք ունի։

«Մեր աշխատաշուկայում 50+ [տոկոսը] կանայք են, որովհետև բնակչության մեծ մասն էլ են կանայք։ Բայց, այնուամենայնիվ, նրանք անհավասար պայմաններում են, աշխատավարձի պատճառով։ Կանայք ավելի ցածր աշխատավարձ են ստանում, քան տղամարդիկ»,- նշել է Թորոսյանը։

Վիճակագրական կոմիտեի ամենաթարմ տվյալները վերաբերում են սեպտեմբերին, և դրանց համաձայն՝ Հայաստանում աշխատողների 51,2 տոկոսը կանայք են՝ 413 հազար 289 աշխատող։ Սակայն այստեղ պարզաբանման կարիք ունի այն, որ ոլորտների մեծ մասում ավելի շատ հենց տղամարդիկ են զբաղված, և կանանց թվային առավելությունն ապահովվում է 2-3 ոլորտների հաշվին, հատկապես՝ կրթություն և առողջապահություն։

Այս երկու ոլորտները նաև մեծ անձնակազմ են ներառում։ Սեպտեմբերի դրությամբ կրթության ոլորտում 126 հազար 693 աշխատող է եղել, 98 հազար 178-ը եղել են կանայք։

Կանանց աշխատավարձերի ցածր լինելու մասին դիտարկումը կապված է հենց այս ոլորտի հետ, քանի որ կրթության ոլորտում աշխատավարձերն ամենացածրերից են Հայաստանում։

Ուշագրավ է նաև ֆինանսական և ապահովագրական գործունեության ոլորտը, որտեղ կանայք ավելի շատ են, քան տղամարդիկ, բայց այդ ոլորտում տղամարդիկ գրեթե երկու անգամ ավելի բարձր աշխատավարձ են ստանում, քան կանայք։

Ինչպես երևում է գրաֆիկից՝ սեռով պայմանավորված աշխատավարձի տարբերություն կա անխտիր բոլոր ոլորտներում, մի մասում՝ քիչ, մյուս մասում՝ շատ։

Գարիկ Հարությունյան