Դահուկորդ Միքայել Միքայելյանի տուգանքը կվճարի Հայաստանի դահուկային սպորտի ֆեդերացիան։ Այդ մասին հայտարարել է ֆեդերացիայի նախագահ Գագիկ Սարգսյանը։
Ավելի վաղ Հայաստանի առաջատար դահուկորդը տուգանվել էր Իտալիայում անցկացված Tour de Ski մրցաշարի ժամանակ իր համազգեստի վրա «Ադրբեջան» բառը փակելու համար: Ադրբեջանի պետական զբոսաշրջության կոմիտեն Դահուկային սպորտի և սնոուբորդի միջազգային ֆեդերացիայի հովանավորներից է։
«Միքայելն իր դիրքորոշումն է հայտնել: Նա չի որակազրկվել, միայն տուգանվել է: Միքայելը չի խոստացել, որ չի անի նույն բանը հաջորդ մրցաշարերում, քանի որ դա մեկանգամյա ակցիա չէր:
Ողջունում եմ Միքայելի քայլը: Որքան էլ ուզում են տուգանեն՝ արժանապատիվ հայը մնում է արժանապատիվ հայ: Հայաստանի դահուկային սպորտի ֆեդերացիան կվճարի տուգանքը»,- ֆեյսբուքյան էջում նշել է Գագիկ Սարգսյանը:
Հայաստանի դահուկային սպորտի ֆեդերացիայի նախագահը նաև հայտնել է, որ ԿԳՄՍ նախարարությունից ֆինանսավորում չեն ստացել 2026թ․ ձմեռային Օլիմպիական խաղերին մասնակցելու համար։
«Տարիներ շարունակ ԿԳՄՍ նախարարությունից խնդրում-աղաչում ենք դրամական աջակցություն՝ 2026թ․ ձմեռային Օլիմպիական խաղերի մասնակցության համար, բայց չենք ստացել որևէ լումա: Միքայել Միքայելյանն ու այլ մարզիկներ ապահովել են վարկանիշային միավորներ օլիմպիական քվոտաներ ստանալու համար։ Իսկ մեր հարևան պետությունը ոչինչ չունի այս մարզաձևում, բայց ստացել է աշխարհի գավաթի փուլեր ու աշխարհի առաջնություն անցկացնելու հնարավորություն: Սա այն դեպքն է, երբ պետք է նաև սովորել հակառակորդից»,- ասել է Գագիկ Սարգսյանը։
Նշենք նաև, որ այսօր տեղի ունեցած ասուլիսի ընթացքում ԿԳՄՍ նախարար Ժաննա Անդրեասյանն ասել էր, որ դահուկորդից գրավոր պարզաբանում են խնդրել։
