Մադուրոն Նյու Յորքի դաշնային դատարանի առաջ կկանգնի

Վենեսուելայի նախագահ Նիկոլաս Մադուրոն և նրա կինը՝ Սիլիա Ֆլորեսը, որոնք ձերբակալվել էին ԱՄՆ-ի գործողության ընթացքում, հունվարի 5-ին առաջին անգամ կկանգնեն Նյու Յորքի դաշնային դատարանի առջև։

Ավելի վաղ դաշնային դատավորը հրապարակել էր մեղադրական եզրակացությունը, որում Մադուրոյին, նրա կնոջն ու ևս չորս անձանց չորս կետով մեղադրանք էր առաջադրվել, այդ թվում՝ «թմրաահաբեկչության» և կոկաինի ներմուծման դավադրության համար։

Մինչ այդ, ԱՄՆ նախագահ Դոնալդ Թրամփը լրագրողներին ասել է, որ կարող է նոր հարված հասցնելու հրաման տալ, եթե Վենեսուելան չհամագործակցի Միացյալ Նահանգների հետ։ Թրամփը նաև սպառնացել է ռազմական գործողություններ սկսել Կոլումբիայում և Մեքսիկայում՝ հայտարարելով, որ Կուբայի կոմունիստական ​​ռեժիմը, «կարծես, պատրաստ է անկման»։

«Ես չգիտեմ, թե նրանք ինչպես են մնալու ջրի երեսին, եթե ընդհանրապես մնան, բայց Կուբան այս պահին որևէ եկամուտ չունի։ Նրանք իրենց ամբողջ եկամուտը ստանում էին Վենեսուելայից, վենեսուելական նավթից»,- ասել է Թրամփը Air Force One ինքնաթիռում։

«The Atlantic»-ին տված հարցազրույցում էլ ԱՄՆ նախագահը սպառնացել է Վենեսուելայի նախագահի պաշտոնակատար Դելսի Ռոդրիգեսին՝ նշելով, որ «եթե նա ճիշտ չվարվի, շատ բարձր գին կվճարի, հավանաբար, ավելի բարձր, քան Մադուրոն»։

Ռոդրիջեսը Թրամփին ուղղված ուղերձ է հրապարակել՝ հայտարարելով, որ վենեսուելացիները «արժանի են խաղաղության, այլ ոչ թե պատերազմի»։

«Սա միշտ եղել է նախագահ Նիկոլաս Մադուրոյի դիրքորոշումը, և սա բոլոր վենեսուելացիների դիրքորոշումն է հենց հիմա։ Սա այն Վենեսուելան է, որին ես հավատում եմ, այն Վենեսուելան, որին ես նվիրել եմ իմ կյանքը», – ասել է նա «Correo del Orinoco»-ում հրապարակված հայտարարության մեջ։