Bloomberg․ Ռուբիոն կստանձնի Վենեսուելայի կառավարումը ԱՄՆ-ի կողմից

Վենեսուելայի ղեկավար Նիկոլաս Մադուրոյի ձերբակալումից հետո երկրի կառավարման հարցում ԱՄՆ-ի կողմից գլխավոր վարչական դերը ստանձնելու է ԱՄՆ պետքարտուղար Մարկո Ռուբիոն։ Այս մասին կիրակի՝ հունվարի 4-ին, Bloomberg-ը հայտնել է՝ հղում անելով իր աղբյուրներին։ Ռուբիոն կուբայական ծագում ունեցող ամերիկացի, ծնվել է Մայամիում՝ Կուբայից գաղթած ընտանիքում։

Bloomberg-ի մանրամասներով՝ ԱՄՆ նախագահ Դոնալդ Թրամփը հայտարարել է, որ մեծ ուշադրություն է դարձնում Վենեսուելայի նավթային ոլորտին, և որ ամերիկյան նավթային ընկերությունները «միլիարդավոր դոլարներ» են ներդնելու երկրի նավթային ենթակառուցվածքների վերականգնման համար։ Թրամփի թիմը՝ պետքարտուղար Մարկո Ռուբիոյի, ներքին անվտանգության հարցերով խորհրդական Սթիվեն Միլլերի և պաշտպանության նախարար Փիթ Հեգսեթի հետ համատեղ, այս պահին մշակում է Վենեսուելայի կառավարման կառուցվածքը, հայտնել է The Wall Street Journal-ին մեկ այլ բարձրաստիճան պաշտոնյա։

Վենեսուելայի Գերագույն դատարանը նախօրեին երկրի նախկին գործադիր փոխնախագահ Դելսի Ռոդրիգեսին նշանակել է ժամանակավոր նախագահ։ Նշվում է, որ նոր նշանակումը անհրաժեշտ է «կառավարման համակարգերի աշխատանքների վարչական շարունակականությունն ապահովելու» և «ազգային պաշտպանությունը պահպանելու» համար։

Ինչպես փոխանցում է dpa գործակալությունը, Ռոդրիգեսը հայտնել է իր պատրաստակամությունը ստանձնելու պետության ղեկավարի պաշտոնը։ Սակայն այդ հայտարարությունից հետո նա կրկին հավաստիացրել է իր նվիրվածությունը Մադուրոին։

«Այս երկրում կա միայն մեկ նախագահ, և նրան կոչվում է Նիկոլաս Մադուրո Մորոս»,- նշել է Ռոդրիգեսը՝ շրջապատված լինելով նախարարներով և զինվորականներով՝ Ազգային պաշտպանության խորհրդի նիստում։

Դոնալդ Թրամփը, անդրադառնալով այս նշանակմանը, հայտարարել է, որ ամերիկյան ռազմական ներկայությունը Վենեսուելայում անհրաժեշտ չի լինի, եթե Դելսի Ռոդրիգեսը «անի այն, ինչ իրենք ուզում են»։ ԱՄՆ-ը կղեկավարի Վենեսուելան մինչև իշխանության «անվտանգ» և «ճիշտ» փոխանցումը, նշել է Սպիտակ տան ղեկավարը մամուլի ասուլիսում։ Միևնույն ժամանակ Թրամփը մերժել է վենեսուելական ընդդիմության առաջնորդներից մեկի՝ Խաղաղության Նոբելյան մրցանակակիր Մարիա Կորինա Մաչադոյի թեկնածությունը՝ Վենեսուելայի ապագա կառավարման համար։

Հիշեցնենք՝ հունվարի 3-ի լույս 4-ի գիշերը ԱՄՆ բանակը հարվածներ է հասցրել Վենեսուելայի մայրաքաղաք Կարակասին։ Դոնալդ Թրամփը հայտարարել է, որ Վենեսուելայի ղեկավար Նիկոլաս Մադուրոն և նրա կինը՝ Սիլիա Ֆլորեսը, բռնվել են «Դելտա» հատուկ ջոկատի կողմից և դուրս բերվել երկրից՝ նախ ԱՄՆ ռազմաբազա Գուանտանամոյում, իսկ հետո տեղափոխվել Նյու Յորք։

ԱՄՆ իշխանությունները Մադուրոյին պաշտոնապես մեղադրել են «թմրանյութերի ահաբեկչության», զենքի պահման և վենեսուելական դիվանագիտական անձնագրերի վաճառքի համար։ Հունվարի 4-ին ԱՄՆ արդարադատության նախարարության կայքում հրապարակվել է մեղադրական եզրակացությունը։ Այստեղ Մադուրոյին ներկայացվում է մեղադրանք, թե նա ղեկավարել է Cartel de los Soles հանցավոր խմբավորումը, որը ԱՄՆ-ում հայտարարված է ահաբեկչական կազմակերպություն, ինչպես նաև մասնակցել է իր կնոջ, որդու և մերձավորների հետ միասին կոլումբիական խմբավորումներով կոկաինի արտադրության և տեղափոխման սյուժեներին։