28.04.2026 | 13:26
Աշխարհի ամենաթանկ ֆուտբոլային ակումբները
Ադրբեջանի ԱԳ նախարարն անդրադարձել է հայ գերիների ազատ արձակմանն ու, այսպես կոչված, «Արևմտյան Ադրբեջանին»
Քաղաքականություն
26.12.2025 | 19:40
Նրանք, ովքեր երկրի դեմ արշավ են իրականացնում Ադրբեջանում բանտարկված հայերի ազատ արձակման համար, պետք է հասկանան, որ նման քայլերով անհնար է ստիպել ադրբեջանական պետությանը՝ ընդունել օրենքին չհամապատասխանող որոշումներ։ Այս մասին ասել է Ադրբեջանի արտաքին գործերի նախարար Ջեյհուն Բայրամովը՝ 2025 թվականի արդյունքների վերաբերյալ ասուլիսում պատասխանելով լրագրողների հարցերին։
«Մենք ականատես ենք Ադրբեջանում բանտարկված հայկական ծագում ունեցող անձանց ազատ արձակման բազմաթիվ կոչերի։ Սակայն յուրաքանչյուր պետության իրավունքն է՝ ձերբակալել նրանց, ովքեր մարդկության դեմ հանցագործություններ են կատարել իր տարածքում։ Ադրբեջանը, գործելով մեծ մարդկայնությամբ, 2023 թվականին հակաահաբեկչական միջոցառումներից հետո ապահովեց տասը հազարից ավելի մարդկանց վերադարձը Հայաստան, որոնք ահաբեկչական խմբի անդամներ էին։ Ինչ վերաբերում է Ադրբեջանում ներկայում դատապարտված 23 անձանց, որոնց քրեական դատավարությունը շարունակվում է, նրանք ծանր հանցագործություններ կատարած անձինք են»,- նշել է նա։
Ադրբեջանցի նախարարն ասել է, թե որևէ որոշում չի կարող կայացվել այն անձանց վերաբերյալ, որոնք ներկայում ենթարկվում են քրեական հետապնդման․ «Նրանք, ովքեր արշավ են իրականացնում Ադրբեջանի դեմ նրանց ազատ արձակման համար, պետք է ընդունեն, որ անհնար է նման քայլերով ստիպել ադրբեջանական պետությանը ընդունել օրենքին չհամապատասխանող որոշումներ»։
Նա խոսել է նաև Հայաստանի հանդեպ տարածքային պահանջներ պարունակող, այսպես կոչված, «Արևմտյան Ադրբեջանի» համայնքի թեմայից:
«Արևմտյան Ադրբեջանի հարցը բացառապես արևմտյան ադրբեջանցիների իրավունքների հարց է և ոչ մի կերպ չի կարող մեկնաբանվել որպես Հայաստանի նկատմամբ տարածքային պահանջ։ Երբեմն փորձեր են արվում այս հարցը տեղափոխել այլ հարթություն և ներկայացնել որպես Ադրբեջանի տարածքային պահանջներ Հայաստանի նկատմամբ։ Սակայն դրա համար բացարձակապես ոչ մի հիմք չկա։ Սա արևմտյան ադրբեջանցիների օրինական իրավունքների հարցն է»,- նշել է նա։
Վերջերս OC Media-ն հայտնել էր, որ իր ուսումնասիրած արտահոսած փաստաթղթերը բացահայտում են, թե ինչպես է Ադրբեջանի նախագահի աշխատակազմը համակարգում և ֆինանսավորում «Արևմտյան Ադրբեջան» նարատիվի միջազգային տարածումը։
Թարգմանությունը՝ Էմմա Չոբանյանի
