Հնդկաստանի խոշորագույն մասնավոր նավթային ընկերությունը վերսկսել է ռուսական նավթի գնումները

Հնդկաստանի խոշորագույն մասնավոր նավթավերամշակման ընկերությունը՝ Reliance Industries-ը, վերսկսել է ռուսական նավթի գնումները՝ չնայած Ռուսաստանի հիմնական ձեռնարկությունների դեմ ԱՄՆ-ի կողմից սահմանված շարունակական պատժամիջոցներին, հաղորդել է Bloomberg-ը։

Աղբյուրների համաձայն՝ Reliance Industries-ը ռուսական նավթ է գնում զեղչված գներով այն մատակարարներից, որոնք պատժամիջոցների չեն ենթարկվում, և այն ուղարկում է Հուջարաթի վերամշակման գործարան: Օրական 660,000 բարել արտադրող վերամշակման գործարանն արտադրանքը մատակարարում է տեղական սպառողներին, գրում է DW-ի ռուսական ծառայությունը։

Նշվում է, որ ռուսական նավթի փոխադրման համար Reliance Industries-ը պայմանագիր է կնքել RusExport-ի հետ՝ Aframax լցանավեր օգտագործելու համար։ Գործակալությունը նշում է, որ այս սխեմայի օգտագործումը, հավանաբար, կնվազեցնի Հնդկաստանում ռուսական նավթի գնումների անկումը, որը, ըստ պաշտոնյաների, այս ամիս կարող է ավելի քան կիսով չափ կրճատվել։

ԱՄՆ-ը հոկտեմբերի 22-ին նոր պատժամիջոցներ էր կիրառել Ռուսաստանի դեմ՝ հղում անելով Ռուսաստանի «խաղաղության գործընթացի նկատմամբ լուրջ հետաքրքրության բացակայությանը»՝ Ուկրաինայում Մոսկվայի կողմից հրահրված պատերազմը դադարեցնելու համար: Սև ցուցակում ներառված են Ռուսաստանի երկու խոշորագույն նավթային ընկերություններ՝ «Ռոսնեֆտը» և «Լուկօյլը», ինչպես նաև դրանց դուստր ձեռնարկությունները, որոնք գտնվում են Ռուսաստանում: Խախտումների համար նախատեսված է «քաղաքացիական կամ քրեական պատասխանատվության ԱՄՆ և օտարերկրյա քաղաքացիների նկատմամբ»:

Հոկտեմբերին Reuters-ը հաղորդել էր Reliance Industries-ի ծրագրերի մասին՝ կրճատելու կամ ամբողջությամբ դադարեցնելու ռուսական նավթի ներմուծումը՝ ԱՄՆ պատժամիջոցները չխախտելու համար։

Թարգմանությունը՝ Էմմա Չոբանյանի