Հասարակություն
22.12.2025 | 14:07
Ադրբեջանից ներկրված բենզինը վաղվանից վաճառվելու է «Ռան Օիլ» բենզալցակայանների ցանցում։ Այս տեղեկությունը Factor.am-ի հետ զրույցում հայտնեց «Մեգա Թրեյդ» ընկերության տնօրեն Կարեն Հայրիյանը։
«Ռան Օիլ»-ը պատկանում է «Մեգա Թրեյդ»-ին։
«Կարծում եմ՝ մեր հաճախորդները վաղվանից կարող են գնել։ Նախատեսում ենք վաճառել մանրածախ շուկայում՝ «Ռան Օիլ» ցանցում։ Մեր հաճախորդները իրենց գրպանի վրա կզգան գնի տարբերությունը։ Նախնական նախատեսել ենք, որ մեկ լիտրը վաճառվելու է 440 դրամ՝ «Պրեմիում» տեսակի բենզինը։ Հիմա շուկայում միջին գինը 520 դրամ է»,- Factor.am-ի հետ զրույցում ասաց Կարեն Հայրիյանը՝ շեշտելով, որ այս պահին մատչելի վառելիք վաճառելու հնարավորություն կա։
«Մեգա Թրեյդ» ընկերությունը ՀՀ ԱԺ ՔՊ խմբակցության պատգամավոր, խոշոր գործարար Խաչատուր Սուքիասյանի ընտանիքին պատկանող «Սիլ կոնցեռնի» կազմում է։ Նշենք, որ «Մեգա Թրեյդ»-ը Ադրբեջանից 600 տոննա բենզին է ներկրել։ Ընդհանուր ՀՀ է ներմուծվել 22 վագոն բենզին։ Ներկրողների թվում մեկ այլ ընկերություն էլ կա, որի անունը դեռ չի հրապարակվում։
Իսկ ինչպես են բենզինի ներկրմամբ և վաճառքով զբաղվող ընկերությունները տեղեկացել ադրբեջանական բենզին ներկրելու հնարավորության մասին։ Կարեն Հայրիյանը հետևյալ պարզաբանումը ներկայացրեց․
«Մենք գնումը կատարել ենք վառելիքի վերավաճառքով զբաղվող միջազգային կազմակերպությունից, պայմանագիրը կնքել ենք իրենց հետ, բայց, որ ծագումն ադրբեջանական է, այո՛»։
Նա նշեց, որ ադրբեջանական բենզինի ներկրումը լինելու է շարունակական։ Ադրբեջանական բենզինը Հայաստան է հասել Վրաստանի տարածքով։ Պաշտոնական Թբիլիսին այս անգամ տարանցման գումար չի պահանջել, իսկ թե հետո որքան է լինելու՝ տեղեկություններ չկան։ Կարեն Հայիրյանը նշեց, որ ՀՀ կառավարությունն այդ հարցով զբաղվում է։
«Ներկա պահին հստակեցված ոչինչ չկա։ Ես որքանով տեղյակ եմ կառավարությունը ակտիվ բանակցություններ է վարում այդ խնդիրը լուծելու համար, հուսով եմ կսստացվի բանակցությունների արդյունքում ստանալ այնպիսի տարանցման սակագին, մեր քաղաքացիների համար մատչելի վառելիք ներկրենք։ Ես որքանով որ տեղեկացված եմ այս պահին սահմանված տարանցման սակագին չկա»,- ասաց նա։
Նարեկ Կիրակոսյան
