Կոնֆերենցիաների լիգա․ «Նոան» հաղթեց «Լեգիային» ու մոտ է փլեյ-օֆֆի ուղեգրին. ՏԵՍԱՆՅՈՒԹ

«Նոան» մոտ է դառնալու առաջին հայկական ակումբը, որը կխաղա եվրագավաթների փլեյ-օֆֆում։

Կոնֆերենցիաների լիգայի 5-րդ տուրում Հայաստանի չեմպիոն ու գավաթակիր «Նոան» 2:1 հաշվով կամային հաղթանակի հասավ լեհական «Լեգիայի» նկատմամբ ու գործնականում ապահովեց փլեյ-օֆֆի ուղեգիր։

Վազգեն Սարգսյանի անվան «Հանրապետական» ստադիոնում կայացած հանդիպման հաշիվը երրորդ րոպեին բացեց «Լեգիայի» դանիացի հարձակվող Միլետա Ռայովիչը` օգտվելով «Նոայի» պաշտպանի ու դարպասապահի անհամաձայնեցված գործողությունից (տեսանյութ)։

Առաջին խաղակեսում երկու թիմերն էլ ունեցան գոլային պահեր, բայց դարպասի այլ գրավում չարձանագրվեց։

Ընդմիջումից հետո դաշտի տերերն ավելի ակտիվ էին և 57-րդ րոպեին հավասարեցրին հաշիվը: Աչքի ընկավ բրազիլացի հարձակվող Մատեուս Այաշը (տեսանյութ)։

Երկրորդ խաղակեսում «Նոան» ուներ խաղային առավելություն, որը գոլի վերածեց 84-րդ րոպեին։ Հաղթական գոլի հեղինակ դարձավ Նարդին Մուլահուսեյնովիչը, որը նաև գոլային փոխանցում էր կատարել Մատեուս Այաշին։ Բոսնիացի հարձակվողը Կոնֆերենցիաների լիգայի ընթացիկ մրցաշրջանում գոլ խփեց 5-րդ խաղում անընդմեջ (տեսանյութ)։

Հայաստանի ազգային հավաքականի կիսապաշտպան Վահան Բիչախչյանը «Լեգիայի» կազմում փոխարինման մտավ 82-րդ րոպեին։

5 խաղից հետո երևանյան ակումբն ունի 8 միավոր և նախավերջին տուրից առաջ ընթացիկ 13-րդ տեղում է։ «Լեգիան» 3 միավորով 30-րդն է։ Կոնֆերենցիաների լիգայում փլեյ-օֆֆի ուղեգիր են նվաճում 1-24-րդ տեղ գրաված թիմերը։

Նախորդ 4 խաղերում «Նոան» հաղթել է խորվաթական «Ռիեկային» (1։0), ոչ-ոքի գրանցել ռումինական «Ունիվերսիտատեա Կրայովայի» (1։1) ու շոտլանդական «Աբերդինի» (1։1) հետ և պարտվել Չեխիայի գավաթակիր «Սիգմային» (1։2)։ Լիգայի փուլի վերջին տուրում Սանդրո Պերկովիչի գլխավորած թիմը դեկտեմբերի 19-ին արտագնա հանդիպում է անցկացնելու Կիևի «Դինամոյի» հետ, որն ունի 3 միավոր և կորցրել է հաջորդ փուլ դուրս գալու շանսերը։