Ինչպես քանդվեց Ֆիրդուսի շուկան

Այսօր ժամը 17:00-ի սահմաններում ավարտվեց Ֆիրդուսի բացօթյա տոնավաճառի ապամոնտաժումը: Երևանի քաղաքապետարանի աշխատակիցները ոստիկանության ներկայացուցիչների աջակցությամբ և շինտեխնիկայի գործադրմամբ քանդեցին շուկան:

Հիշեցնենք՝ վաղ առավոտվանից Ֆիրդուսի շուկայի տարածքում լարված իրավիճակ էր: Առավոտյան ժամը 6:00-ին հարակից տների բնակիչները արթնացել էին տրակտորի ձայնից: Տոնավաճառի հարակից տարածքում տեղակայված էր տրակտոր, որը, բնակիչների խոսքով, տարածք էր բերվել ապամոնտաժումն իրականացնելու նպատակով: 

Արթնացած բնակիչները և տարածք շտապած շուկայի առևտրականները, սական, թույլ  չտվեցին սկսել ապամոնտաժումը: Նրանք նախ ընդդիմացան՝ նշելով, որ իրենց չեն իրազեկել, որ ապամոնտաժումը տեղի է ունենալու հենց այսօր, ապա պահանջեցին  քաղաքապետարանի ներկայացուցիչներից իրենց ներկայացնել ապամոնտաժման թույլտվությունը, որը, սակայն, այն այդպես էլ չներկայացվեց:

Մի քանի ժամ տևած բանակցություններից հետո շինտեխնիկան հեռացվեց տարածքից, իսկ առևտրականները  բացեցին տաղավարները՝ առևտուր անելու հույսով, սակայն կեսօրին կրկին շինտեխնիկան բերվեց տոնավաճառի տարածք և քաղաքապետարանի աշխատակիցներն այս անգամ արդեն կոշտ մեթոդներով և ուժի գործադրմամբ քանդեցին տոնավաճառը:  Տաղավարների ապամոնտաժման ընթացքում  սկսված քաշքշուքի արդյունքում երկու քաղաքացիներ թեթեւ  վնասվածք ստացան. նրանցից մեկի ոտքը վնասվեց, մյուսիինը՝ ճակատը:

Հիշեցնենք՝ հունիսի սկզբին Երևանի  քաղաքապետ Տարոն Մարգարյանը տեղեկացրել էր, որ առաջիկայում Ֆիրդուսի տոնավաճառի տարածքում մեկնարկելու են շինարարական աշխատանքներ, նա հանձնարարել էր  առևտրի և սպասարկման վարչությանն ու Կենտրոն վարչական շրջանի ղեկավարին  բանակցել մայրաքաղաքում գործող տոնավաճառների և շուկաների սեփականատերերի հետ՝ Ֆիրդուսի շուկայի առևտրականների գործունեությունն առևտրային այլ տարածքներ տեղափոխելու համար:

Տոնավաճառի աշխատակիցները, սակայն, առևտրային այլ կենտրոններ տեղափոխվելու ցանկություն չունեն, ասում են՝ առաջարկվող պայմաններն իրենց ձեռնտու չեն: Ի դեպ, նրանք գրավոր նամակ էին ուղարկել քաղաքապետարան՝ խնդրելով մինչև տարեվերջ շուկայում աշխատելու թույլտվություն, սակայն այդպես էլ իրենց նամակի պատասխանը չստացան:

Այսպիսով՝ այսօրվանից Երեւանի ամենահին եւ հայտնի տոնավաճառներից մեկը՝  Ֆիրդուսի շուկան,  այլեւս գոյություն չունի:

Շողիկ Գալստյան