29.07.2026 | 14:27
Զելենսկին հայտնել է Ռյազանի և Պերմի նավթավերամշակման գործարաններին հարվածների մասին
Նեթանյահուն իրեն ներում շնորհելու խնդրանքով դիմել է Իսրայելի նախագահին
Քաղաքականություն
30.11.2025 | 15:49
Իսրայելի վարչապետ Բենիամին Նեթանյահուն իր նկատմամբ շարունակվող դատական գործընթացների ֆոնին նախագահական ներում ստանալու պաշտոնական խնդրանք է ներկայացրել նախագահ Իսահակ Հերցոգին։ «Արմենպրես»-ի փոխանցմամբ` այս մասին հաղորդել է Իսրայելի հեռուստատեսության 12-րդ ալիքը։
«Վարչապետ Նեթանյահուն նախագահական ներում ստանալու պաշտոնական խնդրանք է ներկայացրել նախագահին», – հաղորդել է հեռուստաալիքի լրատվական ծառայությունը։
Ավելի վաղ Իսրայելի նախագահ Իսահակ Հերցոգի գրասենյակը հայտարարել էր ԱՄՆ նախագահ Դոնալդ Թրամփից նամակ ստանալու մասին, որում ամերիկացի առաջնորդը կոչ էր անում դադարեցնել Նեթանյահուի դեմ քրեական հետապնդումը և ներում շնորհել վարչապետին։ Հերցոգը պատասխանել էր՝ նշելով, որ անհրաժեշտ կլինի նախագահական ներում հայցող անձի պաշտոնական խնդրանքը։
2024 թվականի դեկտեմբերին Թել Ավիվի շրջանային դատարանում սկսվել են Իսրայելի վարչապետի դեմ գործերի վերաբերյալ երկարատև լսումները։ Նեթանյահուի նկատմամբ իրականացվում է մի քանի քրեական հետաքննություն։ Կաշառակերության ամենալուրջ մեղադրանքները ներկայացված են այսպես կոչված «գործ 4000»-ով, որը վերաբերում է երկրի հեռահաղորդակցության խոշորագույն խմբի՝ Bezeq-ի համար լոբինգին՝ ընկերության կողմից վերահսկվող Walla առցանց լրատվական կայքում Նեթանյահուի դրական լուսաբանման դիմաց։
Նեթանյահուի դեմ առաջադրվել են խարդախության և վստահության խախտման մեղադրանքներ ևս երկու գործով։ Առաջինը վերաբերում է մեղադրանքներին, համաձայն որոնց Նեթանյահուն թանկարժեք նվերներ՝ բացառիկ սիգարներ և շամպայն է ստացել հոլիվուդյան պրոդյուսեր Արնոն Միլչինից, որոնց ընդհանուր արժեքը քննիչները գնահատում են գրեթե 300,000 դոլար։ Քննիչները կարծում են, որ նվերների դիմաց Նեթանյահուն լոբինգ է արել օլիգարխի անձնական և գործարար շահերի համար։
Մյուս գործը վերաբերում է վարչապետի փորձերին՝ բանակցելու երկրի ամենամեծ մեդիա խմբերից մեկի՝ Yedioth Ahronoth-ի սեփականատիրոջ հետ։ Վարչապետի գործունեության բարենպաստ լուսաբանման դիմաց պետք է ընդունվեր օրենք, որը կսահմանափակեր Yedioth Ahronoth-ի մրցակից Israel Hayom անվճար թերթի գործունեությունը։
Նեթանյահուն նախկինում հայտարարել էր, որ այս մեղադրանքների նպատակը իրեն վարչապետի պաշտոնից հեռացնելն է։
